Komandante Jerál PNTL Komisáriu Faustino da Costa, halo abertura ba kursu investigasaun kriminál ba daruak nian ne’ebé partisipa husi komandante eskuadra polísia na’in-23 iha Sentru Formasaun Polísia, Comoro, Dili. Imajen/PNTL

DILI, 25 agostu 2020 (TATOLI)- Komandu Polísia Nasionál Timor-Leste (PNTL) liuhusi Sentru Formasaun Polísia (CFP) kontinua fó formasaun ba komandante eskuadra na’in-23 kona-ba knaar servisu dilijénsia investigasaun kriminál nian.

Notísia Relevante : Komisáriu Faustino alerta ba investigadór polísia tenke domina lei no K-RDTL

Kursu Investigasaun faze daruak ne’e atu hasae membru sira-nia koñesimentu kona-ba prosesu no lala’ok oinsá investiga kazu ruma, atu nune’e, bele orienta membru sira hodi halo servisu ho profisionál.

Komandante CFP, Superintendente Xefe Arquimino Ramos hateten, kursu  importante tebes, tanba komandante eskuadra sira mós presiza hatene prosedimentu ne’ebé hala’o iha Kódigu Prosesu Penál no Kódigu Prosesu Sivíl Timor-Leste atu bele orienta membru sira hala’o servisu ho didi’ak.

Tuir nia haree katak, dala barak iha interpretasaun lei ne’ebé lahanesan tanba ne’e maka CFP ho parseiru TLPDP realiza kursu ida ne’e, atu nune’e, Komandante ho Investigadór sira interpreta artigu hirak ne’ebé iha lei ho di’ak atu bele prosesa kazu tuir lei ne’ebé vigora.

Notísia Relevante : Komandante eskuadra na’in-20 remata kursu investigasaun

“Ha’u rekomenda ba komandante jerál atu komandante sira ne’ebé tuir kursu ne’e pelumenus servisu lai iha eskuadra ne’ebá, selae sira kursu tiha hotu muda fali ba fatin seluk entaun koñesimentu ne’ebé iha la bele transfere ba maluk sira seluk no labele aplika koñesimentu ne’ebé sira aprende,”  hateten Komandante Arquimino Ramos.

Liuhusi komunikadu imprensa ne’ebé Agência Tatoli asesu husi Komandu PNTL, ohin, Komandante Servisu Investigasaun Kriminál Nasionál (SIKN) Superintendente Xefe José M. Neto Mok hateten, kursu investigasaun ne’e ho objetivu atu fó kapasita komandante sira atu bele hatene lalauk servisu investigasaun nian, nune’e sira bele orienta investigadór no jere membru sira hodi halo atendimentu ba kazu krime hirak ne’ebé akontese iha área jurídiku eskuadra ida-idak.

Servisu Investigasaun Kriminál iha ligasaun ho Ministériu Públiku (MP) nu’udar na’in ba asaun penal katak, PNTL hasoru no kaer prosesu investigasaun tanba ne’e Komandante sira tenke iha koñesimentu kle’an para bele jere investigadór sira iha terrenu bainhira simu delegasaun kompeténsia husi MP atu kompleta prosesu ba kazu ruma.

Kursu Investigasaun ne’e nu’udar kontinuasaun husi kursu ne’ebé hala’o tiha ona iha loron 03 jullu 2020, no kursu datoluk sei hala’o semana oin hodi kompleta komandante eskuadra hotu-hotu partisipa iha kursu ne’e.

Kursu daruak ne’e partisipa husi Komandante Polísia Eskuadra na’in-23 ho durasaun tempu loron lima, hahú loron husi loron 24 agostu 2020.

Notísia Relevante : PJR Dili Fó Formasaun ba Investigadór PNTL

Jornalista   : Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here