Prokuradora Ivònia Guterres. Imajen/Eugenio Pereira

DILI, 15 outubru 2019 (TATOLI)-Prokuradoria Jerál Repúblika (PGR-sigla portugés) Munisípiu koopera ho Komandu Polisia Munisípiu Dili, ohin, realiza  formasaun ba membru unidade investigasaun kriminál ho unidade tránzitu iha are investigasaun.

Formasaun ne’e partisipa direita husi membru PNTL Munisipiu haat (4), Dili, Ermera, Liquiça ho Aileu, hamutuk ema nain 50 ho matéria formasaun  kona-ba prosedimentu investigasaun ba krime violénsia doméstika, matéria kona-ba prosedimentu investigasaun ba krime komún sira ámbitu kódigu prosesu penal no kódigu penal, matéria kona-ba prosedimentu investigasaun ba krime komún sira ámbitu kódigu prosesu penál no kódigu penal no matéria kona-ba prosedimentu investigasaun ba krime komún sira ámbitu kódigu prosesu no kódigu penál rodoviáriu.

Prokuradoria  Repúblika Munisípiu Dili, Ivónia Guterres, konsidera, formasaun ne’e importante tebes hodi bele hasa’e koñesimentu membru PNTL sira  iha lei liga ho prosesu kualkér kazu ne’ebé akontese polisia bele halo prosesu tuir faktu hodi rekolla provas ho evidénsia forte para lori prosesu ba Ministériu Públiku hodi prosesa tuir lei.

“Formasaun ne’e  ami hala’o beibeik ba polisia investigasaun sira no polisia tránzitu sira tanba haree ba natureza servisu iha relasaun hamutuk entre polisia no Ministériu Públiku hodi haree liu ba kazu krime sira ne’ebé akontese hodi hasa’e ita nia polisia sira nia koñesimentu oinsá mak buka meius atu rekolla provas ruma,” esplika Invónia Guterres.

Nia fó ezemplu bainhira polisia halo investigasaun ba kazu ruma la aprezenta provas ho korretu, depois Ministériu Públiku aprezenta ba Tribunál too julgamentu kazu ne’e disolve, tanba de’it faktu la forte. Tanba ne’e, Prokuradoria Jerál Munisípiu Dili  husu ba  PNTL kada munisipiu aprezenta investigadór ema na’in 15 no Dili nia na’in 20  hodi haforsa sira nia kapasidade  iha prosesu investigasaun.

Nia hatutan, ba kazu fragante delitu ne’ebé PNTL halo prosesu iha oras 72 tenke aprezenta ona dadus forte ba Ministériu Públiku para prosesa

Iha parte seluk, Prokuradoria Ivónia Guterres alerta ba polisia investigadór Munisipiu Aileu, ho Liquiça presiza kumpre regra investigasaun nian. Tanba dala barak Ministériu Públiku husu investigadór munisipiu rua atu aprezenta kazu ruma  tenke konklui investigasaun ho dadus forte no lalais.

Ivónia mós preokupa, dala barak sira fó ona formasaun ba membru PNTL atu halo investigasaun ba kualkér kazu, maibé Komandu PNTL tuir lei sempre halo rotasaun ba membru sira nia servisu afeta mós ba servisu investigasaun polisia nian.

Iha fatin hanesan, Komandante Polisia Munisípiu Dili, Superintendente Xefe, Armando Monteiro, konsidera, formasaun ne’e importante tebes ba membru investigadór sira hodi aproveita tempu rona didi’ak matéria sira ne’ebé formadór sira fahe ba sira bele hasa’e ona sira nia koñesimentu.

Komandante ne’e mós rekoñese membru PNTL barak durante ne’e sei menus tebes iha rekursu investigasaun nian no ba oin Komandu PNTL no Prokuradoria Jerál  kontinua  fó fasilita formasaun ba investigadór PNTL nian.

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here