Komandante Jerál PNTL Komisáriu Faustino da Costa hala’o enkontru avaliasaun servisu ho investigadór PNTL. Imajen/PNTL.

DILI, 10 agostu 2020 (TATOLI) Komandu Polísia Nasional Timor-Leste (PNTL) liuhusi Servisu Investigasaun Kriminál Nasional (SIKN), foin lalais ne’e, hala’o enkontru avaliasaun ho Xefe Investigasaun Munisípiu sira kona-ba servisu hirak ne’ebé durante ne’e hala’o ona.

Komandante Jerál PNTL Komisáriu Faustino da Costa iha ninia intervensaun alerta ba Xefe Investigasaun Munisípiu nu’udar investigadór tenke domina no iha koñesimentu di’ak kona-ba Lei sira hanesan Konstituisaun RDTL, Kódigu Prosesu Penal no Lei Seguransa Interna ne’ebé maka atribui ba servisu PNTL nian iha terrenu bainhira mosu kazu ruma.

Autoridade másimu instituisaun seguransa ne’e mós motiva xefe investigasaun munisípiu sira atu mellora di’ak liután servisu iha futuru, liu-liu atendimentu ba kazu sira hanesan suisídiu (Tara-aan) ne’ebé suspeitu sira deskoñesidu no enkoraja xefe investigasaun sira-ne’e atu mantein servisu ne’ebé lao di’ak ona durante ne’e atu kontinua halo di’ak liután.

Iha fatin hanesan reprezentante parseiru TLPDP ne’ebé maka durante ne’e apoiu SIKN hateten, planu parseiru nian hodi kontinua apoiu Komandu PNTL liu-liu parte SIKN iha area projetu balun hanesan harii edifísiu Sentru Servisu Krime Tranznasional ne’ebé maka oras ne’e daudaun ninia obra lao hela.

TLPDP konsidera katak projetu balun ne’ebé planeia ona atu finansia ba SIKN maka kontinua fornese formasaun ka treinamentu vijilánsia ba membru SIKN sira iha nasionál no mós munisípiu, formasaun investigasaun nivel-rua (2) ba grupu-rua (2), formasaun espesífiku uza modelu iha entrevista, formasaun VPU, agresaun sexuál no kontinua apoiu operasaun investigasaun kriminál.

Xefe SIKN Superintendente, Xefe José Neto Mouk hateten, objetivu husi enkontru ne’e maka atu halo avaliasaun servisu ida ba xefe investigasaun munisípiu sira no nasionál atu oinsá maka bele hadi’a di’ak liután iha futuru.

“Iha oportunidade ida ne’e ita atu fahe mós informasaun kona-ba susesu ne’ebé maka ita nia Prokuradór Jerál halo relatóriu ba Parlamentu kona-ba servisu ne’ebé maka PNTL parte SIKN halo durante ne’e hanesan konklui kazu sira ne’ebé mosu, tanba husi relatóriu ne’e PNTL hetan susesu ida ne’ebé di’ak tebes hodi ita atinje 100% kompara ho instituisaun seluk ne’ebé maka iha,” dehan José liuhusi komunikadu imprensa ne’ebé Agência Tatoli asesu, ohin.

Iha enkontru ne’e, Xefe Investigasaun munisípiu sira mós hato’o sira-nia susesu ne’ebé maka halo durante ne’e, hato’o mós sira nia obstákulu, problema no dezafiu sira ne’ebé hasoru bainhira halo atendimentu ba kazu ruma ne’ebé mosu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here