Jurista Timoroan, Avelino Coelho. Imajen/Dok.Tatoli

DILI, 25 agostu 2020 (TATOLI)- Dezenvolvimentu ekonomia Timor-Leste hahú husi independénsia mai to’o ohin loron la’o ladún efetivu, maske iha ona polítika Planu Estratéjiku Dezenvolvimentu Nasionál (PEDN) 2011-2030.

Husi PEDN ne’ebé Governu kria, iha planu barak maka hahú implementa ona iha territóriu Timor-Leste, hanesan eletrisidade, estrada nasionál ba munisípiu, projetu infraestrutura sira, mas iha mós planu barak maka too agora seidauk bele implementa, tanba kestaun rekursu umanu atu uza Fundu Mina-rai.

Eis Sekretáriu Estadu Polítika Enerjétika iha Governu Aliansa Maioria Parlamentár (AMP), Avelino Maria Coelho, esplika bainhira Governu hakarak dezenvolve no implementa lalais PEDN presiza halo mudansa ba Lei Fundu Petrolíferu para dezenvolve nasaun ne’e ba oin ho lalais.

Tuir nia haree, durante tinan-20 independénsia, Timor-Leste moris dependénsia maka’as ba Fundu Mina-rai no ohin loron Governu rai de’it osan ne’e iha banku internasionál ho objetivu atu poupa no sei afeta ba prosesu dezenvolvimentu iha rai laran la’o neineik liután.

Avelino Coelho hatutan, Governu no Parlamentu tenke tau idea ida de’it atu halo mudansa ba Lei Fundu Petrolíferu maka sei fó biban ba Governu kada tinan foti Orsamentu Jerál Estadu (OJE) husi Rendimentu Sustentável Estimativa (RSE) hodi sustenta investimentu no kontribui aselera dezenvolvimentu iha rai laran.

Timor-Leste rasik, kria ona Fundu Petróleu ne’ebé promulga ona iha loron 3 agostu 2005. Lei Fundu Petróleu emenda ona iha loron 23 agostu 2011.

“Uluk kedas ha’u la konkorda ho polítika governu atu foti osan RSE ho 3%, tanba osan ne’e la too atu finansia ita nia dezenvolvimentu ho lalais. Tanba ita nia rekursu Fundu Mina-rai ne’e tenke diversifika hodi foti osan liu 3% investe maka’as ba agrikultura no setór indústria produtivu no kooperativa sira hodi aban bairua ita nia fundu mina-rai hotu ona, agrikultór sai baze ekonomia nasionál, ho ida ne’e maka ita bele ko’alia sustentabilidade ekonomia,” hateten Avelino Coelho bainhira sai oradór iha grandee debate ho tema “Sustentabilidade Ekonomia” iha ámbitu selebrasaun aniversáriu Institutu Defeza Nasionál Timor-Leste (IDN-TL) dala-X  iha Palaçip Nobre, Lahane, Dili.

Notísia Relevante : PN Aprova Alterasaun Lei Fundu Petrolífera no Atividade Petrolífera iha Espesialidade

Avelino Coelho husu atu Governu brani halo investimentu iha tempu agora ba futuru sei fó benefísiu direita ba makro no mikro ekonomia nasaun Timor-Leste atu labele moris dependénsia ba Fundu Mina-rai.

Avelino Coelho mós kontra idea hosi lider polítiku balun ne’ebé husu mantein foti osan RSE 3% hodi poupa Fundu Mina-rai iha banku internasionál ne’e nu’udar opsaun polítika ida ne’ebé la kontribui atu dezenvolve ekonomia no lori povu sai husi mukit.

“Se ita poupa- poupa osan maka povu kiak ba nafatin no too loron ita atu ajuda de’it ema kiak mós labele, tanba agora problema dezempregu kada tinan aumenta ba beibeik, no bainhira maka ita bele dezenvolve ita nia nasaun ho lalais,” nia argumenta.

Notísia Relevante : Prezidente Repúblika Veta Lei Fundu Petrolíferu

Vise-Ministra Finansa, Sara Lobo Brites. Imajen/Egas Cristovão

Iha fatin hanesan, Vise Ministra Finansas, Sara Lobo Brites nu’udar oradór hato’o agradese bele reprezenta governu aprezenta polítika haree “Sustentabilidade Ekonomia”.

Sara Lobo dehan, too agora Governu Timor-Leste sei mantein foti OJE kada tinan tuir Lei Fundu Petrolíferu nian, tanba governu haree katak, too ohin loron polítika sustentabilidade ekonomia kontribui maka’as tebes ba sustentabilidade gastu fiskál ba tinan barak.

Sara dehan, governu ne’e mós iha kompromisu kada tinan iha aprezentasaun OJE kontinua finansia parseiru dezenvolvimentu hanesan setór privadu hodi investe maka’as iha setór agrikultura, turizmu hodi kontribui ba dezenvolvimentu ekonomia no lori Timor-Leste husi dependénsia ba fundu mina-rai.

Nia dehan, idea husi Oradór Avelino Coelho ne’ebé dezafia Governu atu foti osan liu 3% hodi finansia dezenvolvimentu ekonomia nu’udar ideia di’ak, maibé governu mantein ho lei sira.

“Ha’u hanoin governu nia pozisaun 3% lei permite ba (orsamentu) ida ne’ebé maka governu foti. Tanba kada tinan governu sempre foti osan liu 3% hodi finansia infraestrutura ne’ebé bele promove mós dezenvolvimentu no dezenvolve ekonomia rai laran,” Sara Lobo hateten.

Membru governu ne’e hatutan, mekanizmu foti osan liu 3% ne’e nu’udar bein dezenvolvidu, maibé Governu Timor-Leste tenke sukat ho rekursu mina-rai ne’e tenke iha sustentabilidade.

Vise Ministra Sara Lobo tenik, ideia ne’ebé oradór Avelino Coelho livre bele hato’o hanoin ba governu, maibé governu iha ninia regra no prosedimentu sira atu foti osan tenke kumpre lei no haree ba reseita ne’ebé Estadu Timor-Leste hetan.

Governu halo ona kolesaun no jestaun asosia ona ho rikusoin petróleu nian, Regula transferénsia ba Orsamentu Estadu, no Fornese ba governu kontabilidade no supervizaun ba atividade sira ne’e.

Akordu Jestaun entre Ministériu Finansas no Banku Sentrál Timor-Leste asina ona iha tinan 2005. Ida ne’e emenda ona iha juñu 2009 no depois ninia aneksu 1 emenda ona iha outubru 2010.

Husi tinan 2005 to’o juñu 2009 ministériu tomak maneja husi Banku Sentrál Timor-Leste nian (BPA antigu) no investe de’it iha kontratu Governu Estadu Unidus nian

Iha juñu 2009, hili ona Bank for International Settlements (BIS) hanesan primeiru fundu manajer internasionál hodi maneja persentajen 20 husi totál Fundu Petróleu no investe ona iha.

Iha outubru 2010, Jestaun Investimentu Schroder, manajer primeiru Fundu asaun, lori tama ba maneja mandatu asaun global ho montante to’o persentajen 4 husi totál Fundu Petróleu.

Haree Relatóriu Trimestrál no Relatóriu Dezempeñu Mensál iha website Banku Sentrál Timor-Leste nian kona-ba detallus dezempeñu portfolio Fundus nian.

Estrutura Governasaun Fundu Petróleu Nian no Modelu governasaun Fundu Petróleu maka bazeadu ba transparénsia nivel aas no fó sai informasaun hodi tulun harii apoiu públiku ba jestaun justu ba reseita petroleum nian no hodi redús risku governasaun aat nian.

Hanesan Ezekutivu, Governu liuhosi Ministériu Finansas maka responsavel ba jestaun tomak Fundu Petróleu nian, bodik ba povu Timor-Leste nian.

Lei Fundu Petróleu nian halo Governu responsavel ba Parlamentu liuhusi ejijénsia relatóriu oin-oin. Jestaun operasionál oras ne’e daudaun hala’o husi Banku Sentrál Timor-Leste, ne’ebé investe Fundu kapitál haktuir orientasaun estabelese ona hosi Ministériu Finansas no mandatu dezenvolve hosi Konsellu Konsultivu.

Selebrasaun tinan X ezisténsia IDN-TL kria mós debate ho tema sentral ‘Seguransa no Defeza Nasionál’ partisipa husi Oradór Atuál Deputadu Parlamentu Nasionál Bankada PD, Mariano Assanami Sabino,  Premiadu Nobel da Paz, José Ramos Horta, Prezidente Komisaun B Parlamentu Nasionál, Jose Agostinho Somotcho, Vise Ministru Interiór,  António Armindo no tema ‘Dezafiu Estratéjiku Impaktu COVID-19 ba Timor-Leste’ sei hala’o iha loron 26 agostu 2020 ho oradór Ministra Saúde, Odete Maria Freitas, eis Ministru Saúde, Rui Maria de Araújo ho moderadór IDN.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here