Negosiadór Prinsipál, Xanana Gusmão, bainhira aprezenta alterasaun Lei Haat iha Parlamentu Nasionál. Imajen dok. Tatoli

DILI, 19 jullu 2019 (TATOLI)—Parlamentu Nasionál (PN) halo ona debate no aprovasaun iha espesialidade ba Proposta Lei nú.5/V-segunda alterasaun lei 9/2015 3 agostu, kona-ba Lei Fundu Petrolífera no Proposta Lei nú.4/V- primeira alterasaun lei nú.4/2003 1 jullu, kona-ba Dezenvolvimentu Petróleu iha Tasi Timor (estabilidade tributária), segunda alterasaun ba lei nú.13/2005, 2 setembru-Lei Atividade Petrolífera.

Hafoin hetan aprovasaun iha jeneralidade kinta (18/7) kalan, plenária halo deliberasaun hodi halo diskusaun no votasaun espesialidade iha komisaun, nune’e Komisaun C ne’ebé trata Asuntu Finasa Públika kontinua halo diskusaun no ikus mai aprova Proposta Lei Fundu Petrolíferu.

Prezidente Komisaun C, Deputadu Fernanda Lay informa, hafoin debate iha Komisaun, proposta nú. 5 aprovadu ho votu a-favór 9, kontra 4 no abstensaun 0.

“Ami aprova iha espesialidade ba Lei  Fundu Petrolíferu, tanba laiha proposta entaun ami vota. Tuir loloos, atu halo proposta mós tenke haree tanba la’ós alterasaun ne’ebé boot, tenik Deputada Bankada CNRT ne’e iha resintu Parlamentu Nasionál, sesta ne’e.

Tuir nia, razaun halo alterasaun tanba lei ne’e tenke armoniza ho akordu Frontreira Marítima ne’ebé asina ona iha marsu 2018 hodi prepara na ratifikasaun tratadu.

Nune’e mós ba Lei Tributária mós presiza halo alterasaun hodi armoniza, tanba uluk Timor-Leste hetan de’it reseita hosi Royalty, maibé  atividade petrolífera seluk la kobre.

“Tanba ne’e hakarak ka lakohi Timor-Leste iha Lei Haat ne’ebé tenke altera, enkuantu Austrália rasik iha lei 25 ne’ebé sei halo alterasaun,” tenik Fernanda.

Deputada ne’e hateten, benefísiu hosi alterasaun ne’e barak. “Dívida ita-nia osan tama dezde marsu 2018, maibé lá ratifika tratadu ne’e mak kada fulan ita selu millaun $5 ba Austrália, maibé ho ratifikasaun tama diretamente ba ita-nia kofre estadu. Segundu, ita-nia funsionáriu sira ne’ebé serbisu iha Tasi Timor mós hetan benefísiu hanesan traballadór estranjeiru,” argumenta Prezidente Komisaun C.

Nia esplika, kona-ba tributasaun, klaru katak impostu ho seluk bele sai direitu ba Timor-Leste, tanba ne’e lei hirak ne’e tenke armoniza, nune’e Timor-Leste labele lakon bebeik tributasaun.

Nune’e mós, nia esplika, kona-ba Lei Migratóriu Espesiál, ne’ebé mak aplikável ba Projetu Bayu-Undan tenke halo alterasaun tanba kontratante tama sai iha projetu Bayu-Undan tuir sira-nia hakarak maibé hafoin ratifikasaun, Timor-Leste sei kontrola dokumentu hotu-hotu ne’ebé ligadu ba atividade petrolífera iha Tasi Timor.

Deputada ne’e informa tan, diskusaun ba proposta lei ne’e presiza to’o loron tolu tanba ohin konklui ona no segunda sei halo votasaun iha finál globál.

Aprovasaun Proposta Lei Nú.4-Lei Atividade Petrolífera

Iha sorin seluk, Komisaun D ne’ebé trata asuntu Ekonomia no Dezenvolvimentu, aprova ona iha espesialidade Proposta Lei nú.4/V- primeira alterasaun lei nú.4/2003 1 jullu, kona-ba Dezenvolvimentu Petróleu iha Tasi Timor (estabilidade tributária), segunda alterasaun ba lei nú.13/2005, 2 setembru-Lei Atividade Petrolífera.

Prezidente Komisaun D, Virgínia Ana Belo informa, Komisaun D mós aprova ona Proposta Lei nú. 4. Maski la temi rezultadu votu maibé nia dehan maioria hosi Bankada Governu vota a-favór.

“Ohin ami diskute Lei Atividade Petrolífera, liliu artigu sira ne’ebé Governu hakarak halo alterasaun no agora ami prepara relatóriu pareser. Ami vota a-favór maibé kolega sira hosi opozisaun mak vota kontra. Ami vota artigu ba artigu ne’e ha’u la dekór ona,” dehan Prezidente Komisaun D.

Nia hatutan, alterasaun hosi lei ne’e atu korresponde ba Tratadu Fronteira Marítima. “Lei sira ita altera ne’e, Timor mós altera Austrália mós tenke altera. Kampu ida uluk hamutuk Austrália sei mai hotu ita. Lei ida uluk prevalese iha área konjunta (JPDA) ne’e hela ba ita-nian. Entaun, kondisaun saida mak ita atu halo, ita tenke muda mós lei sira seluk hanesan tributária, book hotu-hotu lei sira ne’e,” Virgínia esklarese.

Nia tenik, alterasaun ne’e sei la implika ba lei seluk, tanba Lei Atividade Petrolífera, Lei Fundu Petrolífera ho Lei Tributária iha ligasaun ba malu.

“Sei lei haat ne’e mak ita la halo alterasaun, entaun ita lalika hanoin ratifikasaun tanba Austrália sei la aseita. Ne’e konkordánsia no kondisaun ekivalente ida ne’ebé Governu rua tenke halo katak parte rua ho kompañia sira labele sofre,” katak Deputada Bankada CNRT ne’e.

 Jornalista: Evaristo Soares Martins

Editór: Xisto Freitas

Notísia Relevante: Pakote Lejizlativa Tratadu Fronteira Marítima Aprovadu iha Jeneralidade

HAKEREK NO HATÁN

Please enter your comment!
Please enter your name here