Prezidente Repúblika, Francisco Guterres Lú Olo. Imajen Tatoli/António Gonçalves

DILI, 26 novembru 2019 (TATOLI) – Prezidente Repúblika (PR), Francisco Guterres Lú Olo, veta Dekretu Parlamentu Nasionál nº 11/V, alterasaun daruak ba Lei nº 9/2005, 3 Agostu, Lei Fundu Petrolíferu.

“Ha’u veta tanba haree katak númeru 3 husi artigu 15º A, ne’ebé tama iha artigu 3 Dekretu ne’e, la hatuir ita-nia Konstituisaun”, tenik PR Lú Olo liuhosi konferénsia impensa iha Palásiu Prezidensiál, Bairro Pité, tersa ne’e.

Tuir Xefe Estadu, nia rasik maka husu ba Tribunál Rekursu (TR) atu haree Dekretu ne’e hodi iha 15 novembru 2019, liuhusi akórdaun ho deklarasaun konjunta husi juís tolu, TR deklara hamutuk no fó hatene PR Lú Olo katak artigu refere inkonstitusionál hasoru Konstituisaun.

Nune’e, PR veta hasoru artigu ne’e, tanba konsidera lejizladór sira hakarak fó dalan ba investimentu iha operasaun petrolífera, atu hetan valór persentuál no real ne’ebé proporsionalmente aas liu fali investimentu sira seluk, biar investimentu sira seluk fó retornu finanseiru aas iha prazu badak ba Fundu Petrolíferu, garantidu no ho risku kiik.

“Ha’u veta tanba inkonstitusionalidade, katak artigu ne’e hasoru fali Konstituisaun Repúblika no ha’u deklara ida ne’e tuir de’it ita-nia lei-inan, iha ninia alínea c) no  e) artigu 85º nian, nº 1 artigu 88º nian no números 1, 2 no 3 artigu 149º nian”, PR subliña.

Artigu ne’e determina katak “labele aplika liu porsentu lima hosi Fundu Petrolíferu iha iha klase ativu (katak buat hotu-hotu ne’ebé bele fó rendimentu) no kálkulu limite porsentu lima ne’e haree ba valór totál, sura hamutuk valór husi Fundu Petrolíferu  no mós mai husi investimentu, iha data ne’ebé halo investimentu nasional”.

Artigu ne’e, refere ba operasaun petrolífera no mós ba investimentu iha operasaun sira ne’ebé tama iha ámbitu investimentu sira seluk, ne’ebé halo tuir lei haruka. Tuir  númeru 4 artigu 15 Lei Fundu Minarai nian, kategoria ida ne’e bele hetan investimentu ho osan husi valór Fundu Petrolíferu nian to’o porsentu lima.

“Regra ba kalkula valór ne’e muda tiha bainhira Deputadu sira aprova Dekretu ne’e. Númeru 3 artigu 15º A nian uza dalan oin seluk hodi kalkula valór ba investimentu iha operasaun petrolífera, tanba kálkulu foun ne’e soma hamutuk faktór rua. Ida maka valór totál Fundu Petrolíferu no ida seluk mak valór totál investimentu. Valór rua ne’e soma hamutuk iha data ne’ebé halo investimentu inisiál”, Xefe Estadu esplika.

Nia dehan, bainhira soma hamutuk  valór totál Fundu Petrolíferu ho  valor totál investimentu, sai boot liu porsentu lima husi valór Fundu Petrolíferu, tanba valor rua ne’e fiksa iha data ne’ebé halo investimentu inisiál.

“Ida ne’e signifika katak soma totál faktór rua nian ka valór limite investimentu nian la muda, biar valór totál Fundu Petrolíferu ka investimentu nian bele tuun enkuantu halo hela investimentu”, nia akresenta.

Tuir PR, lei la define loloos limite ba investimentu iha operasaun petrolífera, tanba ne’e  la hatene valór investimentu maka ida ne’ebé no valór ne’e  iha rohan-laek.

“Tanba ita lahatene valór investimentu no ita la iha regra atu limita valor ne’e,  ita iha inserteza boot no hasoru risku aas tebetebes. Situasaun ida ne’e  loke dalan ba ita atu hasai osan barak liu limite ida ne’ebé sei la permite tanen Fundu Petrolíferu ba tempu kleur. Ita bele haree momoos katak iha risku ba Fundu Petrolíferu  menus ba bebeik no bele mohu de’it bainhira valór investimentu iha operasaun petrolífera aas liu”, nia salienta.

Nia dehan tan, karik alterasaun ne’e pasa, fundu sei sai hanesan kaixa nakloke ida no bainhira  hasai hela de’it osan husu fundu ne’e hodi investe iha operasaun petrolífera maka kaixa ne’e sei mamuk loron ida.

“Se Dekretu husi Parlamentu Nasional ne’e pasa, ita hotu sei liu situasaun ida mukit tebes tanba ita sei la iha osan atu tau iha sektór edukasaun, saúde no agrikultura. Sei la iha osan atu tulun  veteranu sira, terseira idade, Bolsa de Mãe no benefísiu seluk tan”, Xefe Estadu esplika tan.

Jornalista: Cipriano Colo

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here