Jogador Lalenok FC kontra Assalam FC. Imajen/Midia FFTL.

DILI, 20 agostu 2020 (TATOLI)-Klube Lalenok United FC, ne’ebé lidera husi Treinadór ho Nasionalidade Xíle , Simón Elissetche, kinta ne’e halakon ona klube Assalam FC ho valór 2-0 iha jogu abertura Kopa Federasaun Futeból Timor-Leste (FFTL), époka 2020 iha Estádiu Munisipál Dili.

Estádiu Munisipál Dili mak sai sasin ba jogu ne’e, tanba Treinadór Klube Lalenok FC Simón Elissetche, ne’ebe antes ne’e mós lidera Klube Assalam manán Assalam ho 2-0.

Klube Assalam mak hamorin kareira Treinadór ho nasionadade Xíle kareira iha jogu Liga Futeból Amadora époka 2016 bainhira klube refere seidauk promovidu ba primeira divizaun, halakon fali klube Assalam 2-0.

Jogador Lalenok United FC kontra Assalam FC.Imajen/Midia FFTL.

Iha minutu dahuluk jogu ne’e  la’o jogadór husi ekipa rua lansa kedas kontra ho atake ba malu tuir maneira no tékniku klube idaidak nian.

Oportunidade ne’e jogadór husi Klube Lalenok joga ho tékniku bola dook (bola long) no aas, maibé kontráriu ho Assalam satan ho tékniku ne’ebé treinadór Gaspar Quintão, orienta maka bola duir ka tik tak.

Notísia Relevante :FFTL Realiza Kopa 2020 ho Osan Rihun $ 200

Ho tékniku ne’ebé Lalenok uza maka iha minutu 17 nia laran, sorte aat monu ba Assalam tanba jogadór defeza husi Assalam halo falta hasoru Jogadór Lalenok, Fabio Christian (93), no husi oportunidade ne’e Daniel Adadi (77) konsege marka ho koidadu hodi fura rede Assalam ho 1-0.

Jogu ne’e komesa barullu no manas liután iha minutu 31 iha rede Assalam nia-oin, tanba Elias Mesquita (10)uza tan oportunidade ho marka tan golu id aba Assalam hodi muda eskore ba 2-0.

Husi Golu rua ne’e maka termina joga ne’e iha minute 45 primeira parte nian, depois tama ba segunda parte, ekipa rua kontinua lansa kontra no atake maka’as liután maibé la rezulta golu ruma hodi termina eventu ne’e iha minutu 90.

Árbitru Pedro Maia Carvalho, Juliz Liña Romario Tety, António Carvalho, no árbitru rezerva Francisco Pereira maka dirije jogu refere.

Ho derrota ne’ebé Assalam hetan, Treinadór Gaspar Quintão, rekoñese klube ne’e falla iha liña oin durante jogu ne’e la’o.

“Lina oin mak sei sai difikuldade mai ami, ohin ami hetan oportunidade lubuk ida atu marka golu maibé lá konsege, entaun ba oin ami sei hela jogu tolu ami sei hadi’a,” dehan Quintão.

Iha fatin hanesan, treinadór Lalenok,  Simón Elissetche, hatete maski mánan maibé nia kontinua hadi’a nafatin liña balun ne’ebé sei falla hanesan klaran no defeza.

Notísia Relevante :Treinadór Lalenok promete sei manán Assalam

“Ohin ami manán maibé ami sei hadi’a nafatin iha liña defeza no klaran tanba sei falla, iha jogu tolu tuirmai fiar katak ami sei manán tan,” katak nia.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here