Prezidente Parlamentu Nasionál, Aniceto Longuinhos Guterres Lopez.

DILI, 17 agostu 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, hateten vizaun atu harii edifísiu foun ne’e hanesan maneira investimentu ida hodi poupa subsídiu sira kada fulan simu ne’e, nune’e subsídiu ne’e bele tama fali ba kofre estadu tanba pakote ida ho rezidénsia deputadu sira-nian.

Notísia Relevante: Edifísiu foun PN no rezidénsia ba deputadu sira sei konstrui iha Hera

Aniceto Guterres hatutan, la’ós harii uma ba deputadu sira maibé instala edifísiu Parlamentu Nasionál nian, klaru iha laran iha kompleksu boot ida, ne’e vizaun bá-oin.

“Deputadu ida fulan ida simu subsídiu alojamentu $450 dollar, kerdizer tinan ida hira. Deputadu ida simu $5.400 ne’e, deputadu ida. Se deputadu na’in-65 deputadu ne’e, osan hira mak sai ona, ne’e só ba subsídiu alojamentu. Deputadu nia uma di’ak mós nia simu nafatin. Se osan hanesan ne’e ita poupa halo investimentu hodi halo deputadu sira-nia uma iha ne’ebá, tanba deputadu nia mandatu hotu sai ona, ne’e uma estadu nian no sei lahalo leilaun hanesan karreta,” Aniceto Guterres informa ba jornalista sira, iha Palásiu Prezensiál Nicolau Lobatu, Bairru Pité, Dili, segunda ne’e.

Prezidente Parlamentu Nasionál ne’e mós preokupa ho Sosiedade Sivíl sira-ne’ebé krítika vizaun ne’e tanba atu instala edifísiu ne’e foin mak iha vizaun.

“Ha’u mós uluk ativista, ha’u hatene. Kuandu ita krítika ka foti problema ne’e, ita mós tenke hanoin fó solusaun. La’ós kestiona tanba ita iha interese. Hanesan ema ruma titip hodi halo propaganda,” nia dehan. 

Nia argumenta, se deputadu na’in-65 mak kada tinan $5.400 entaun tinan lima bele halo uma ida, uma natoon la’ós uma luxu, tanba deputadu mai hosi distritu sira-ne’e uma laiha.

“Nia vantajen ne’e barak liu ida mak poupa osan tanba deputadu sira ba hela ona ne’e nia la hetan ona subsídiu. Se hotu-hotu hanesan, hotu-hotu la hetan subsídiu ona. Se ba hela iha ne’ebá sudsídiu alojamentu laiha ona, ko’a hotu ba estadu. Maneira investimentu hanesan ne’e, ne’e la’ós karreta be habis di pakai tinan lima karreta aat ona sira bele leilaun,” nia hateten. 

Prezidente Parlamentu Nasionál ne’e konsidera katak krítika Sosiedade Sivíl sira-ne’ebé kestiona vizaun ne’e laiha lojika. 

“Loloos ne’e kestiona mak subsídiu alojamentu ba deputadu sira, ne’e karik ha’u fiar, ne’e ita bele deskuti. Buat sira-ne’e hotu sei iha vizaun, saida mak vizaun ho planu. Vizaun ne’e hanoin ba dook, planu ne’e buat ida ita komesa prepara ona katak halo saida, halo nusá, ne’e seidauk iha planu foin mak vizaun. Tanba, hakarak ka lakohi, parlamentu tenke iha edifísiu ida. Iha situasaun hanesan ne’e, bele imajina órgaun soberanu parlamentu ne’e casa do povo,” nia dehan.

Notísia Relevante: PPN informa funsionamentu PN ba PR Lú Olo

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here