Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (19/08). Imajen Tatoli/Egas Cristovão

DILI, 19 agostu 2020 (TATOLI)-Ministru Justisa, Manuel Cárceres da Costa, aprezenta projetu dekretu-lei iha reuniaun ordinária Konsellu Ministru (KM), kona-ba alterasaun daruak Orgánika Ministériu Justisa (MJ).

Diploma ne’ebé hetan aprovasaun hosi ezekutivu ne’e, atualizadu ona ho reforma judisiária.

“Alterasaun ne’e ho objetivu atu reflete kona-ba alargamentu atribuisaun ministériu ne’e nian, tuir redasaun foun Orgánika Governu nian, liuliu refere ba atribuisaun reforma judisiária nian ne’ebé bainhira Ministériu Reforma Lejizlativa no Asuntu Parlamentár (MRLAP) halakon tiha, pasa fali Ministériu Justisa,” esplika Ministru Prezidénsia Konsellu Ministru, Fidelis Manuel Leite Magalhães hafoin reuniaun ezekutivu iha Palásiu Governu, kuarta ne’e.

Notísia Relevante: KM Aprova Implementa Reforma Judisiária No Reforma Lejizlativa

Ezbosu Lei Organizasaun Judisiáriu, Sei Haree Tempu Oportunu Hodi Ba KM

Antes ne’e, iha rekomendasaun importante husi Komisaun Reforma Lejizlativa (KRL) iha VI Governu Konstitusionál ida mak Programa Reforma Setór Justisa, ne’ebé tenke hamosu Lei Organizasaun Judisiária tanba agora daudaun Timor-Leste sei adota regulamentu UNTAET durante tinan 20 nia laran ona.

KRL halo estudu kona-ba Tribunál iha Timor-Leste, identifika no rekomenda ba Governu atu halo Lei Organizasaun Judisiária, maibé atu halo lei ne’e labele bazeia de’it hosi Konstituisaun Repúblika Demokrátika Timor-Leste (KRDTL), maibé tenke husi dadus empíriku Tribunál.

Liuhosi Lei Organizasaun Judisiária bele estabelese seksaun ka unidade ruma hodi halo espesializasaun ba juíz sira atu haree ba kazu bainhira halo julgamentu iha Tribunál.

Antes ne’e, liuhosi desizaun KM  iha tinan kotuk aprova ona rezolusaun rua ne’ebé estabelese polítika Governu iha área Reforma Judisiária no Reforma Lejizlativa.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here