Ministru Justisa, Manuel Cárceres da Costa. Imajen/Antonio Goncalves

 

DILI, 10 jullu 2020 (TATOLI) – Ministru Justisa (MJ), Manuel Cárceres da Costa, sei haree tempu oportunu hodi aprezenta ezbosu lei organizasaun judisiária ba Konsellu Ministru (KM) hodi fó apresiasaun no aprova.

Notísia Relevante : MJ La Konsege Aprezenta Lei Organizasaun Judisiária ba KM

Ministru Manuel Cárceres hateten daudaun ne’e Governu konsentra ba situasaun COVID-19, nune’e mós semana oin Parlamentu Nasionál sei tama resesu, mezmu Governu la resesu.

“Agora ita atu lori lei ne’e sei ba budu de’it iha ne’ebá ne’ebé husik lai hodi haree iha tempu oportunu ruma ita sei lori ezbosu lei organizasaun judisiáriu ne’e ba iha Konsellu Ministru,” informa Ministru Justisa Manuel Cárceres da Costa, hodi responde Ajénsia Tatoli iha edifísiu Servisu Notariadu, Colmera, Dili, kinta horiseik.

Nia hatutan proposta ezbosu lei organizasaun judisiária prontu ona ho nia artigu besik 112, hodi hein de’it lori ba iha Konsellu Ministru (KM) fó apresiasaun hafoin lori ba Parlamentu Nasionál (PN) debate hodi aprova.

Lei organizasaun Judisiáriu importante sei apoiu Governu hodi haree mapeamentu ba dezenvolvimentu setór justisa ida di’ak liután. Tanba besik ona tinan 20 Timor-Leste seidauk iha prodús rasik ninia lejizlasaun lei organizasaun judisiáriu hodi uza lei UNTAET 11/2000 to’o ohin loron no Lei organizasaun Judisiáriu iha tempu Governasaun UNTAET ne’e mak kria Tribunál Distritál hanesan instánsia dahuluk no segundu instánsia maka Tribunál Rekursu.

Nia dehan, kria mós Tribunál haat hanesan Tribunál Dili, Baucau, Suai no Tribunál Distritál Oe-cusse. Nune’e mós iha regulamentu UNTAET kria Ministériu Públiku, Prokuradór Jerál Repúblika ninia nivel hanesan ho Tribunál Rekursu no kria Prokuradór Distritál sira.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here