Reuniaun hamutuk ho dirijente no asesór sira hosi Ministériu Administrasaun Estatál (MAE) nian, ko'alia kona-ba planu desentralizasaun administrativa iha Auditorium Hotel JL-VILA, Ai-Mutin, Dili. Imajen/Osória Marques.

DILI, 18 agostu 2020 (TATOLI)–Ministru Administrasaun Estatál, Miguel Pereira de Carvalho, hateten objetivu sorumutu ohin loron ne’e atu reuniaun hamutuk ho dirijente no asesór sira hosi Ministériu Administrasaun Estatál (MAE) nian, ko’alia kona-ba planu desentralizasaun administrativa ne’ebé maka pertende MAE atu halo iha 2021-2023.

Notísia Relevante: Governu Aprova Rezolusaun Hodi Implementa Polítika Desentralizasaun

Miguel Pereira hatutan, iha reuniaun ne’e MAE sei halo revizaun fila-fali ba estratejia desentralizasaun administrativa ne’ebé aprova ona iha tinan 2019 maibé tanba impase polítika no propagasaun surtu COVID-19 ne’ebé Governu la implementa iha tinan 2020 ne’e.

“Planu ida-ne’ebé maka ami sei halo maka hodi halo revizaun fila-fali ba estratejia desentralizasaun administrativa ne’ebé maka aprova ona iha tinan 2019 maibé tanba mosu impase polítika no propagasaaun surtu COVID-19, atividade barak maka Governu la konsege halo iha tinan 2020. Entaun, Ministériu Administrasaun Estatál pertende halo fila-fali revizaun ba atividade sira ne’ebé ministériu ida-ne’e sei halo iha tinan 2021 to’o 2023, ba asuntu desentralizasaun administrativa nian,” dehan Miguel Pereira do Carvalho ba jornalista sira hafoin hala’o abertura ba seimónia Retiru Revizaun ba Polítika Desentralizasaun Administrativa 2020-2024, iha  Auditórium Otél JL-Vila, Ai-Mutin, Dili, tersa ne’e.  

Agora daudaun, nia dehan, faze desentralizasaun administrativa ne’e forma iha deskonsentrasaun administrativa teritoriál nian ne’ebé nia prosesu ne’e hahú ona iha tinan 2016 to’o agora kontinua de’it iha fraze ne’e.

Tanba ne’e, nia hateten. MAE espera katak diskusaun ohin ne’e atu tranzita faze deskonsentrasaun administrativa teritoriál ne’e ba iha dsentralizasaun instituisionál ne’ebé Munisípiu sira sei transforma hosi forma administrasaun direta Estadu ba administrasaun indireta Estadu.

Nia esplika, atu nune’e bainhira MAE realiza avaliasaun kondisaun mínimu sira atu bele tranzita munisípiu sira ba iha forma poder lokál iha termu artigu 72 Konstituisaun RDTL no mós bazea ba lei proposta lejislasaun sira ne’ebé maka Governu hato’o ona ba Parlamentu Nasionál no espera aprovasaun sira-ne’e aprova iha tempu VIII Governu konstitusionál.

Desentralizasaun administrativa territorial, nia informa, hahú hosi tinan 2016 to’o mai agora no  durante tinan haat ne’e rezultadu maka desentralizasaun hosi munisípiu sira agora daudaun organizadu ne’e iha forma deskonsentrasaun administrativa territorial, ne’ebé munisípiu sira sei iha forma direta Estadu maibé sira iha ona kompenténsia domina oin-oin hanesan saúde, edukasaun no seluk tan.

“Hanesan munisípiu sira agora iha ona rekursu finanseiru no rekursu umanu ne’ebé ita haree, sira rasik halo planu no aprovizionamentu halo jestaun finanseiru rasik iha munisípiu sira. No, agora munisípiu sira iha ona kompeténsia balu ne’ebé ezerse no mós iha rekursu balu ne’ebé sira jere rasik, ne’ebé bele fó esperiénsia ba sira aban bain rua sira tranzita ba poder lokál sira preparadu ona atu hala’o funsaun sira ne’ebé maka reguadu iha poder lokál,” nia hateten.

Membru Governu ne’e dehan, durante ne’e kestaun deskonsentrasaun administrativa nia problema prinsipál maka bainhira iha membru Governu foun, MAE presiza ko’alia fila-fali ho liña ministeriál ho membru Governu sira seluk atu esplika kona-ba faze atuál hosi prosesu desentralizasaun administrativa.

“Ita iha deskonsentrasaun teritoriál, ministériu sira hosi akordu interorgánika ne’ebé maka MAE asina ho relevante sira hahú deskonsentra ona kompeténsia ba iha munisípiu sira. Agora bainhira iha kompeténsia MAE tenke iha garante katak kompeténsia sira ne’ebé fó ba munisípiu sira tenke iha orsamentu. Tanba servisu ida-ne’e, la’os de’it ami mesak maibé tenke servisu didi’ak ho Ministériu Finansa sei aloka orsamentu ba kada ministériu ida-idak,” nia dehan.

Notísia Relevante: Governu la implementa politika desentralizasaun tanba polítika no COVID-19

Jornalista  :  Osória Marques

Editór        :  Cancio Ximenes

HAKEREK NO HATÁN

Please enter your comment!
Please enter your name here