Vise-Ministru Administrasaun Estatál, Abílio José Caetano, kuarta, (19/2/2019). Imajen Egas Cristovão

DILI, (TATOLI) – Governu da-ualu liuhosi enkontru Konsellu Ministru (KM), ohin aprova rezolusaun ida hodi apoiu polítika ba implementasaun desentralizasaun administrativa ba munisípiu sira seluk.

Ministru Administrasaun Estatal en ezersísiu, Abílio José Caetano, hatete polítika desentralizasaun administrativa ne’e hatuur ona iha mandatu konstitusionál iha artigu 72, tanba ne’e hahú kedas iha Governu dahuluk 2003 to’o governasaun agora kontinua hodi implementa.

Porta-fólio (pasta ba dokumentu) boot ne’ebé oitavu Governu fó ba ministériu administrasaun estatál, oinsá implementa polítika desentralizasaun administrativa hodi atinje poder lokál ba ita nia munisípiu sira atu hetan poder propriu (rasik) liuhosi eleisaun munisipál”, dehan Governante ne’e ba jornalista sira iha Palásiu Governu hafoin enkontru.

Tuir planu estratéjiku dezenvolvimentu nasionál iha desentralizasaun prinsípiu ida maka governu estabelese instituisaun Estadu iha munisípiu sira forte no lejítimu.

Nia dehan implementasaun polítika desentralizasuan ne’e la’ós responsabilidade MAE nian de’it maibé ministériu hotu, tanba sei delega kompeténsia ba munisípiu sira iha futuru.

“Tanba ne’e ohin MAE submete rezolusaun ida hodi kesi ministériu administrasaun estatál ho ministériu relevante, fó apoiu ba ami para prosesu desentralizasaun ne’e la’o ba oin efetivu, nune’e tinan haat to’o lima mai ita bele atinje objetivu poder lokál iha munisípiu sira tuir artigu 72 hosi konstituisaun”, afirma.

Antes ne’e nia hatete sei entrega proposta lei kona-ba eleisaun munisipál ba parlamentu iha tempu besik hodi halo diskusuan.

Entretantu, artigu 72 konstituisaun RDTL hakerek kona-ba poder lokál iha alinea 1) sei harii kbiit lokál ho ema ne’ebé koletivu iha rai-laran, ne’ebé iha órgaun reprezentativu, ho knaar atu organiza partisipasaun sidadaun ida-idak nian kona-ba solusaun problema rasik iha sira-nia komunidade no atu promove dezenvolvimentu lokál, no la afeta partisipasaun Estadu nian.

Alinea 2) organizasaun, kompeténsia, funsionamentu no kompozisaun órgaun kbiit lokál nian sei define tuir lei.

Durante mandatu Governu dahitu fó ona delegasaun kompeténsia ba munisipíu haat hanesan Baukau, Bobonaru, Dili no Ermera.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here