Diretór Jerál Ministériu Administrasaun Estatál (MAE), Belarmino Filomeno Neves. Imajen/Osória Marques

DILI, 10 agostu 2020 (TATOLI)–Diretór Jerál Ministériu Administrasaun Estatál (MAE), Belarmino Filomeno Neves, hateten oras ne’e daudaun Governu konsentra ona iha faze deskosentrasaun territoriál tanba Governu iha inisíu liuliu iha VIII Governu ba dahuluk nian, iha ona programa kona-ba desentralizasaun hodi desentraliza administrativa hodi harii Governu lokál iha 2019 ne’e, VIII Governu kria ona rezolusaun númeru 11/2019.

Notísia Relevante: Implementasaun Polítika Desentralizasaun Prejudikadu Tanba Lei

Belarmino Filomeno hatutan, tuir espetativa iha tinan 2002 Governu hala’o ona avaliasaun kondisaun mínimu ba munisípiu sira para hatene nia progresu servisu iha munisipál atu nune’e bele hakat ba eleisaun munisipál ba 2021, maibé tanba asuntu polítika no COVID-19 entaun Governu labele implementa programa refere to’o ohin loron

“Daudaun ne’e Governu konsentra ona iha faze deskonsentrasaun territoriál tanba Governu iha inisíu liuliu iha VIII Governu ba dahuluk nian, iha ona programa kona-ba desentralizasaun no iha hanoin ida desentraliza administrativu hodi harii Governu lokál iha 2019. Tuir avaliasaun (20022), kondisaun mínimu ba munisípiu sira -nia progresu servisu atu nune’e sira ne’ebé di’ak ka prenxe ona kriteria bele hakat ba eleisaun munisipál ba 2021. Maibé infelizmente ita labele hala’o tanba ita enfrenta asuntu polítiku no mós surtu COVID-19 inkui Orsamentu Jerál Estadu (OJE) ne’ebé xumba iha Parlamentu Nasionál. Enatun, ho buat hirak ne’e mak sai obstakulu ida ba ita,” Belarmino Filomeno Neves ba Agência TATOLI, iha nia knaar fatin Vila-Verde, Dili, segunda ne’e.

Nia hateten bainhira seidauk hala’o avaliasaun ba kondisaun mínimu maka seidauk bele hetan solusaun, katak munisípiu ida ne’ebé mak hetan kualifikasaun ka kritéria para tama ba eleisaun iha 2021.

Tanba ne’e, nia dehan, Governu sei iha diskusaun no Governu kontinua esforsu atu servisu hamutuk ho parseiru Uniaun Europeia (EUA) ho MAE inklui ho ministériu seluk liliu relativamente asuntu ho desentralizasaun administrativu. 

Nia informa, Governu seidauk iha serteza katak atu hili munisípiu ida ne’ebé mak tama ka tuir rekezitu Governu nian ne’ebé Governu estabelese ona.

“Ita seidauk iha serteza atu hili munisípiu ida ne’ebé mak ninia klasifikasaun tama ba autoriadade munisipál. Tanke avansa uluk mak presiza ba iha avaliasaun kondisaun mínimu ne’ebé haktuir iha dekretu lei 3/2016 kona-ba grupu tékniku interministeriál inklui autoridade no administrasaun munisipál sira,” Diretór Jerál MAE ne’e hateten.

“Oras ne’e daudaun, ita iha ona manual matadalan ba avaliasaun refere maibé situasaun atuál mak seidauk fó dalan atu bele halo ida-ne’e. Maibé entantu ita propoin ona ita-nia programa ba 2021, ita hahú halo,” nia hatete. 

Bainhira ramata ona, nia haktuir, bele deside no foti solusaun katak munisípiu ida-ne’e ka ida ne’ebá mak konsege prenxe ona rekezitu ba eleisaun munisipál mak progressu servisu hosi kompeténsia adminsitrativa ne’ebé mak delega ona no haktuir iha dekretu lei 3/2016 ne’e. 

Purezemplu, nia hateten, avansu iha parte finansa nian, aprovizionamentu, saneamentu iha munisipál sira, edukasaun ba merenda eskolar la’o loos ona ka seidauk, saúde la’o tuir ona delegasaun iha leten ka lae. 

“Ne’e prosedimentu ne’ebé ita hakarak realidade ne’e sai realizasaun atividade. Agora ita haree fali ba lejislasaun ka regra ne’ebé hatuur kona-ba kompeténsia ne’ebé mak fó ba ne’e,” nia dehan. 

Nia hatutan, seraké kompeténsia hirak ne’e halo duni tuir delegasaun ne’e ka seidauk, ne’e hanesan kritériu jerais maibé kritériu espesífiku mak atendementu iha aporvizionamentu, asuntu finanseiru ne’e, sira jere tuir matadalan ne’ebé iha tantu ein termu rekursu umanu ba iha kuantidade no kualidade.

“Buat hirak ne’e presiza halo avaliasaun ba kompeténsia ne’ebé mak Governu sentrál fó ona ba sira. Bainhira sira hala’o ne’e, nia progresu to’o iha ne’ebe ona. Entaun hosi ne’e mak ita haree no kategória ba valór hira mak hafoin ita halo análiza no válida depois haruka ba Konsellu Ministru,” nia dehan. 

Notísia Relevante: Governu Aprova Rezolusaun Hodi Implementa Polítika Desentralizasaun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here