DILI, 18 agostu 2020 (TATOLI)-Jogadór na’in rua husi nasaun Gana no na’in ida husi Portugal sei reforsa Klube ho ninia lema matak malirin Karketu Dili FC, hodi joga iha Kopa Federasaun Futeból Timor-Leste (FFTL) iha époka 2020 ne’ebé sei abertura iha loron 20 fulan-agostu ne’e iha Estádiu Munisipál Dili.
Jogadór na’in rua husi Gana ne’e maka Joseph Connsom, no Patrick Berko, no Jogadór João Alves husi Portugal, sira na’in tolu ho funsaun joga hanesan defeza.
Notísia Relevante :FFTL Realiza Kopa 2020 ho Osan Rihun $ 200
Treinadór Prinsipál Karketu Dili FC, António Timótio, hateten nia klube halo ona preparasaun másimu ba jogadór sira atu kompete iha eventu nasionál ne’e.
“Ami-nia preparasaun másimu ona, Jogadór estranjeiru tolu ne’e antes ne’e iha ne’e hela (iha Timor-Leste) entaun ami halo akordu ida hodi sira joga ho ami durante kopa hala’o,” informa nia ba Tatoli iha Kampu FFTL Bairru Formosa Dili, tersa ne’e.
Kopa FFTL époka 2020, Karketu Dili FC monu iha grupu C hamutuk ho klube Aitana FC, Sporting Clubo de Timor, Academica no Porto Taibessi.
Notísia Relevante :Klube Assalam otimista sei manán Lalelok United
Entretantu, FFTL realiza Kopa ne’e ho osan rihun $ 200-resin no sei partisipa husi klube futeból hamutuk 22 ne’ebé durante ne’e hamahan aan iha Liga Futeból Amadora (LFA) no agora nakfila ona ba Liga Futeból Timor-Leste (LFTL).
Jornalista : Hortencio Sanchez
Editór : Agapito dos Santos
