Prezidente Assalam FC, Ipolito Soares

DILI, 17 agostu 2020 (TATOLI)-Prezidente Klube Assalam FC, Ipolito Soares, deklara nia klube otimista sei manán Klube Lalenok FC ho golu úniku (1-0) iha jogu abertura Kopa Federasaun Futeból Timor-Leste (FFTL) tinan 2020, ne’ebé sei realiza iha loron 20 fulan-agostu ne’e iha Estádiu Munisipál Dili.

“Ami hatene malu, laiha ekipa ida forte liu, husik minutu 90 iha kampu-laran mak sei determina, ami fiar karik ami manán ho golu 1-0 mós pas ona,” dehan Ipolito ba Tatoli iha ninia rezidensia Kampung-Alor, segunda ne’e.

Nia ho fiar aan hatutan ninia klube iha jogadór ho prestasaun di’ak tanba ne’e prontu atu joga hasoru Klube Lalenok FC ne’ebé ema konsidera Klube boot iha Timor-Leste.

Assalam FC otimista liután sei hadau pontu tolu iha jogu ne’e tanba maiória jogadór sira preparadu hodi kompete iha Kopa FFTL.

Ipolito Soares, hateten maski jogadór antigu hanesan Edit Savio, Daniel Adadi, Armindo no Francyatma Kefi, muda ona ba klube seluk maibé sei la fó impaktu ba klube ne’e tanba sei iha jogadór seluk ho prestasaun di’ak.

Klube 22 maka dada ona rifa hodi partisipa iha Kopa FFTL  2020.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here