Asaun pasífiku husi Aliansa Universitáriu Timor-Leste (AUTL) iha Dili, 17 agostu 2020. Imajen Tatoli/António Gonçalves

DILI, 17 agostu 2020 (TATOLI)-Aliansa Universitáriu Timor-Leste, segunda ne’e kontinua halo manifestasaun hodi husu ba Governu atu kria Dekretu-Lei foun hodi fó subsídiu ba estudante Timoroan iha rai-laran durante implementasaun Estadu Emerjénsia ligadu ho Pandemia Globál COVID-19.

Estudante neebe haliburan iha Movimentu Universitariu Timor Leste (MUTL) halao protesta iha kampus Universidade Nasional Timor Leste nia oin konaba desizaun governu liu husi Ministeriu Edukasaun, Juventude no Desportu neebe halo diskriminasaun hodi foo deit subsidiu ba estudante sira iha rai liur,Dili 17 Agostu 2020.Imajen/Antonio Goncalves

“Ami la konkorda tanba ne’e mak ami-nia asaun ida ne’e fazeadamentu ikus husi asaun sira ne’ebé mak ami halo ona,  ohin ultimo rekursu ami halo manifestasaun ne’e hodi ejize halakon desizaun polítika injustisa no halakon diskriminasaun hasoru estudante sira,”  dehan Reprezentante Portavóz Aliansa Universitáriu Timor Leste (AUTL), Paul dos Santos Soares, durante ninia diskursu iha Kampus Liceu Dili.

Notísia Relevante :AUTL aprezenta karta koñesimentu atu halo asaun pasífiku hasoru Governu

AUTL iha hanoin rua hodi fó hanoin ba Governu, dahuluk ba Ministériu Ensinu Superiór Siénsia no Kultura (MESSK) atu kria diploma ministeriál ida no daruak maka Governu Konstitusionál daualu atu kria fali dekretu lei foun hodi fó subsídiu ba estudante Timoroan iha rai-laran.

Nia konsidera desijaun Governu hodi fó subsídiu ba estudante Timoroan iha rai-liur hamosu diskriminasaun.

Tanba Governu fó subsídiu ba estudante naun bolseiru rihun 2-resin iha nasaun 10 ho osan purvolta millaun $ 1-resin tanba ne’e tenki halo tratamentu hanesan ba estudante Timoroan iha rai-laran.

“Ami sei kontinua organiza tan masa no agora ami orienta ona ba Universitáriu sira iha  universidade idaidak atu hapara atividade akademíku hodi mai hamutuk atu kontinua ejize ami-nia diretu,” tenik tan.

Notísia Relevante :Estudante Rihun Rua Mak Sei Hetan Subsidiu

Entretantu, asaun manifestasaun ne’e sei hala’o durante loron lima hahú segunda to’o sesta semana ne’e.

Polisia Nasionál Timor-Leste (PNTL) maka fó seguransa  ba estudante sira durante asaun manifestasaun iha Kampus Liceu Dili.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here