Ofsial Polísia Nasional Timor-Leste (PNTL) bainhira fó seguransa ba asaun pasífiku kontra ezbosu lei kriminaliza difamasaun iha Kampus UNTL nia oin, Dili, 4 Agostu 2020. Imajen/António Gonçalves

DILI, 13 agostu 2020 (TATOLI)- Grupu Aliansa Universitáriu Timor-Leste (AUTL), ohin, hala’o audiénsia ho Komandu Jerál Polísia Nasionál Timor-Leste (PNTL) hodi aprezenta karta koñesimentu atu halo asaun demonstrasaun pasífiku hasoru Governu Timor-Leste.

Portavós AUTL, Moises Soares Magno dehan, asaun ne’e Grupu Aliansa Universitáriu Timor-Leste sei hala’o iha loron 17 too 21 agostu 2020, iha área Kampus Universidade Nasional Timor Lorosa’e (UNTL) besik Muzeu Rezisténsia nia oin, hodi husu ba VIII Governu ne’ebé lidera husi Primeiru-Ministru (PM) Taur Matan Ruak, atu halo balansu fó subsídiu ba estudante Timoroan iha rai-li’ur no estudante universitáriu iha rai-laran.

“Ami kestiona desizaun polítika injustu husi VIII Governu ne’ebé maka foti desizaun polítika liuhusi Dekretu lei 21/2020 hodi fó subsídiu ba ita-nia maluk estudante Timoroan sira iha rai li’ur, ami haree desizaun ne’e fó de’it subsídiu ba ita-nia estudante naun bolseiru iha rai-li’ur, maibé ami estudante sira iha rai-laran ami la hetan, no ida ne’e hanesan diskriminasaun ida,” hateten  Moises Soares Magno, ba jornalista liuhusi konferénsia imprensa iha Kuartél Jerál PNTL, Caicoli, Dili.

Nia hatutan, asaun pasífiku ne’ebé sira halo la’ós ezije ba Governu atu fó subsídiu hotu ba estudante ensinu superiór iha Timor-Leste, maibé husu atu Governu atu halo balansu polítika hodi labele hamosu diskriminasaun.

Nia hatutan, se Governu la konsege fó bolsu estudu, pelumenus Governu bele ajuda estudante sira iha kada universidade atu selu sira nia osan propina semestre par no impar tinan 2020 nian durante periodu Estadu emerjénsia primeiru too agora.

Asaun pasifika ne’e rasik sei envolve membru AUTL husi universidade haat hanesan, UNTL, UNDIL, UNITAL, UNPAZ  no seluk tan.

Nia hatutan, atu evita ema terseira pesoa labele estraga asaun pasífiku ne’e, UATL husu kolaborasaun PNTL hodi fó apoiu seguransa.

Iha fatin hanesan portavós PNTL, Superintendente Xefe Arnaldo Araújo dehan, parte PNTL aseita pedidu asaun pasífiku bele la’o, maibé tenke kumpre lei manifestasaun númeru 1/2006 hodi husu ba manifestante sira tenke aprezenta karta koñesimentu no kumpre regra kódigu estrada númeru 6/2003.

Nia dehan, PNTL Munisípiu Dili sei hatún rekursu hodi asegura seguransa atu labele mosu problema ruma.

“Ami husu ba estudante sira bele halo asaun, maibé tenke kumpre regra atu labele hamosu problema,” nia hateten.

Arnaldo dehan, daudaun ne’e Timor-Leste implementa hela Estadu emerjénsia ba dahaat ezije mós manifestante sira atu uza nafatin máskara no kontrola distánsia sosiál.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here