Materiál doasaun husi Jack Ma no Alibaba Foundation husi Xina atera iha Aeroportu Comoro, tersa (26/05). Imajen Tatoli/António Gonçalves

DILI, 12 agostu 2020 (TATOLI)-Fundasaun Alibaba husi Xina iha kuarta ne’e apoiu tan ekipamentu prevensaun surtu COVID-19 faze daruak nian ba Ministériu Saúde.

Embaixadór Xina iha TL, Xiao Jianguo, maka reprezenta Fundasaun Alibaba hodi entrega apoiu ne’e ba Ministériu Saúde ne’ebé simu diretamente husi Vise Ministru, Bonifácio Maucoli dos Reis, iha Armazén SAMES Kampung-Alor Dili.

Notísia Relevante :Ohin, Aviaun TRI-M.G Trasporta Tan Materiál Doasaun Jack Ma no Alibaba Foundation

”Ohin Alibaba Fundasaun apoiu tan ekipamentu hanesan máskara ba Ministériu Saúde ho modelu rua ida máskara face masks hamutuk 10.800 no máskara  n95 hamutuk 60.000,”  dehan Xiao Jianguo.

Ba futuru, reprezentante Governu Xina ne’e promete katak sira sei kontinua fó apoiu ba nasaun Timor-Leste liliu ba kombate moras globál coronavirus no mós rekuperasaun ekonomia rai-laran.

Iha fatin hanesan Vise Ministru Saúde, Bonifácio Maucoli dos Reis, hateten ho apoiu fasilidades hirak ne’e sei reforsa servisu Governu nian hodi halo propagasaun ba surtu COVID-19.

Tuir planu ekipamentu prevensaun moras coronavirus ne’e sei distribui ba pesoál saúde sira inklui estudante iha eskola sira inklui entidade relevante ne’ebé servisu ba prevensaun nian.

”Tanba ne’e mak hanoin ho distribui máskara sira ne’e hodi proteje liután ita-nia komunidade liliu hodi kumpri regras ne’ebé mak Ministériu saúde no Organizasaun Mundiál Saúde estabelese ona katak distansiamentu sosiál, uza máskara ida ne’e mak ita alerta ba komunidade  liliu ba sira iha fronteira,” tenik Maucoli.

Entretantu, iha loron 26 fulan-maiu liubá Fundasaun Alibaba hamutuk ho Empreza Xineza Jack Ma, apoiu ona ekipamentu prevensaun COVID-19 ne’ebé entrega liuhosi Ministériu Negósiu Estranjeiru no Kooperasaun (MNEK) no Ministériu Saúde.

Ekipamentu hirak ne’e maka hanesan máskara hamutuk 130.000, luvas medisina 20.000,ekipamentu protesaun pesoál 5.000,protesaun  ba oin 5.010, detection kits 5.088, reajente purifikasaun 5.040, reajente konservasaun amostra 5.000, termómetru 39 ho ventiladór 10.

Notísia Relevante :Governu Timor-Leste Agradese Doasaun Husi Jack Ma no Alibaba Foundation

Jornalista : Felicidade Ximenes

Editór        : Agapito dos Santos

HAKEREK NO HATÁN

Please enter your comment!
Please enter your name here