Aviaun Tri-M.G ne’ebé tula sasán doasaun husi Jack Ma Foundation no Alibaba Foundation atera iha Aeroportu Comoro, tersa (26/05). Imajen Tatoli/António Gonçalves

DILI, 02 junu 2020 (TATOLI) – Prezidente Autoridade Aviasaun Sivíl Timor-Leste (AACTL, sigla portugés), Ana Rosália Ximenes Varella, informa katak Aviaun TRI-M.G husi Jakarta, Indonézia sei tula tan materiál doasaun husi Jack Ma Foundation no Alibaba Foundation mai Timor-Leste.

“Aviaun ida husi Jakarta sei tula tan materiál balun ne’ebé maka foin daudaun husi empreza xineza rua hodi fó apoiu mai ita. Materiál sira ne’ebé maka ohin atu tula tan mai Timor-Leste maka  ventiladór no tuir loloos aviaun ne’e mai horiseik maibé la konsege no ohin maka sira mai fali”, informa Dirijente ne’e ba Agência Tatoli, via telefónika, tersa ne’e.

Kona-ba kuantidade sasán, parte ACCTL ladún hatene ventiladór hira maka sei mai maibé parte AACTL hetan informasaun katak aviaun husi Jakarta lori tan materiál balun.

Entertantu, aviaun ne’ebé sei lori materiál protesaun COVID-19 sei atera iha Aeroportu Internasionál Prezidente Nicolau Lobato, Comoro, tuku 10:00.

Antes ne’e, iha 26 maiu, empreza xineza rua ne’e fó doasaun hanesan máskara hamutuk 130.00, luvas medisina 20.000, ekipamentu protesaun pesoál 5.000, protesaun ba oin hamutuk 5.010, detections kits 5.088, reajente purifikasaun 5.040, reajente konservasaun amostra 5.000, termómetru 39 no ventuladór hamutuk 10.

Nune’e mós, iha loron 28 abríl, Governu Repúblika Populár Xina apoiu materiál ba Governu Timor-Leste hanesan máskara 42.000, máskara KN95 40.000, aventál ba protesaun 4.400, vizeira 4.440, kapa ba sapatu 4.400, luvas ba médiku sira 5.000, termometru 80 no ventiladór portable 90.

Liuhosi pájina Alizila haktuir katak, foin lalais ne’e Jack Ma Foundation no Alibaba Foundation deklara sei fó dosaun máskara millaun 100, máskara N95 millaun 1 no ekipamentu teste millaun 1 ba Organizasaun Mundiál Saúde atu distribui ba nasaun no rejiaun ne’ebé hetan impaktu husi pandemia COVID-19.

Durante pandemia ne’e, empreza xineza rua ne’e fó ona donasaun ba nasaun hamutuk 150 iha Áfrika, Ázia, Europa, Oriente Médiu, Amériku Norte no Súl.

Aleinde ne’e, Fundasaun rua ne’e kria programa ida hanaran MediXchange Global atu kombate COVID-19 atu ajuda médiku espesialista iha mundu tomak atu kompartilla koñesimentu no hadi’a prátika iha luta kontra surtu ne’e.

Jornalista Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here