Materiál doasaun husi Jack Ma no Alibaba Foundation husi Xina atera iha Aeroportu Comoro, tersa (26/05). Imajen Tatoli/António Gonçalves

DILI, 26 maiu 2020 (TATOLI) – Aviaun ho TRI-M.G Asia Airlines ho tipu B-737-300 F ne’ebé transporta materiál doasaun ekipamentu médiku husi Xina, atera iha Aeroportu Internasionál Prezidente Nicolau Lobato, Comoro ohin, tuku 16:50 lorokraik.

Materiál doasaun ba protesaun no kombate COVID-19 ne’e husi empreza xineza, Jack Ma no Alibaba Foundation hodi oferese ba Governu Timor-Leste.

Ministru Negósiu Estranjeiru no Kooperasaun, Dionísio da Costa Babo Soares, apresia vontade no esforsu Governu Repúblika Populár Xina liuhosi empreza xineza bele apoia materiál prevensaun COVID-19 ba Timor-Leste.

Embaxador Xina iha Timor Leste kualia hela ho MNEC Dionisio Babo.Imajen/Antonio Goncalves

“Lori Governu nian naran, hato’o agradesimentu ba Embaixadór Xina ne’ebé maka halo esforsu liuhosi Jack Ma no Alibaba Foundation”, dehan Ministru Dionísiu hafoin simu simbolikamente materiál doasaun husi Embaixadór Xina, iha Sala VIP Aeroportu Comoro, tersa ne’e.

Notísia Relevanate: Materiál Doasaun Husi Jack Ma no Alibaba Foundation To’o Ohin Iha Timor-Leste

Biban ne’e, governante ne’e rekoñese kooperasaun di’ak entre Governu nasaun-rua hodi bele realiza doasaun.

“Ohin ita mai dala ida tan hodi simu apoiu husi Xina no apoiu ida agora husi Fundasaun Alibaba nia boot maka naran Jack Ma, ne’ebé hanesan ema riku iha mundu. Nia fó apoiu ekipamentu ba ita-nia país liuhosi Ministériu Saúde no parte kompenete hodi bele uza kombate moras COVID-19”, nia akresenta.

Iha fatin hanesan, Embaixadór Xina iha Timor-Leste, Xiao Jianguo, hateten nu’udar nasaun belun, Governu Xina prontu fó tulun nafatin ba Governu Timor-Leste hodi kombate surtu COVID-19.

Embaxador Xina iha Timor Leste.Imajen/Antonio Goncalves

“Ha’u orgullu, ohin mai hambrik fali iha ne’e hodi entrega ofisiál ajuda ne’ebé Governu Xina liuhosi Jack Ma no Alibaba Foundation, ho komunikasaun husi Embaixada Xina”, nia akresenta.

Maske nune’e, diplomata ne’e adianta, ajudu ekipamentu ne’e sei la to’o iha ne’e, maibé nu’udar nasaun ne’ebé iha relasaun di’ak, kontinua promete ba oin sei apoiu nafatin Timor-Leste.

Entertantu, seremónia entregra ekipamentu doasaun ne’e simu direta husi Ministru Dionísio, no partisipa husi esposa Primeiru-Ministru, Isabel Fereira, Eis Prezidente Repúblika, José Ramos Horta, Ekipa Sentru Integradu Jestaun Krize (CIGC, sigla portugés) Odete Viegas no Aurélio Guterres, Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, inklui reprezentante Oreganizasaun Saude Mudiál (OMS) iha Timor-Leste.

Materiál ne’ebé to’o mai maka hanesan máskara hamutuk 130.00, luvas medisina 20.000, ekipamentu protesaun pesoál 5.000, protesaun ba oin hamutuk 5.010, detections kits 5.088, reajente purifikasaun 5.040, reajente konservasaun amostra 5.000, termómetru 39 no ventuladór hamutuk 10.

Hafoin hatun kargu hirak ne’e iha Aeroportu Comoro, ekipa sira hahú dizifekta ba sasán doasaun sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here