Eufrazia de Menezes (sorin loos), bainhira akompaña halo tradusaun lian jestuál hamutuk ho Portavós COVID-19, Rui Maria de Araujo (klaran). Imajen Tatoli/Jogerjo Guterres

DILI, 03 marsu 2020 (TATOLI) – Hahú loron hirak liubá, bainhira portavós sira husi Sentru Integradu Jestaun Krize (CIGC, sigla portugés) atualiza informasaun kona-ba COVID-19, iha ekrán televizaun mosu tradutora lian jestuál ida ne’ebé ajuda tebes ema ho defisiénsia sira atu komprende di’ak kona-ba moras perigozu ne’e.

Eufrasia de Menezes hetan kontaktu husi Organizasaun Internasionál Austrália, Partnership Human Development (PHD) hodi halo tradusaun ho lian jestuál, nune’e bele fasilita ema ho difisiénsia sira komprende di’ak liután informasaun ba prevensaun relasiona ho COVID-19 ninian.

“Ami halo tradusaun lian jestuál ne’e ho objetivu atu pasa informasaun ba malu. Sira iha defisiénsia tipu rua maka hanesan labele ko’alia no labele rona entaun liuhosi jestu ida-ne’e sira bele komprende informasaun saida mak fó, entaun liuhosi jestu ne’ebé ha’u halo”, informa tradutora lian jestuál ne’e ba Agência Tatoli iha Sentru Konvensaun Dili (CCD, sigla portugés), sesta ne’e.

Eufrasia relata liután katak, nia apreende lian jestu ne’e tanba ninia oan mós iha defisiénsia.

“Ha’u apreede jestu ida ne’e tanba ha’u nia oan iha defisiénsia tilun, ha’u estuda iha ami-nia organizasaun AGAPE no iha ami-nia profesora ida ema Filipina ne’ebé akumula ema ho defisiénsia tilun no hanorin desde tinan 2006. Ha’u mós aprende ho sira no ohin loron ha’u bele halo”, nia realsa.

Nia komfirma katak ema ho defisiénsia akompaña tebes tradusaun jestuál ne’ebé mosu iha ekrán televizaun.

“Ita nia maluk defisiénsia sira akompaña tanba antes akontese halo tradusaun iha televizaun horseik ne’e, sira halo protesta ona tanba sira uza vídiu ho jestu tau iha Facebook no balun halo jestu. Entaun sira husu tenke prepara mós tradutor lian jestuál nian iha televizaun atu nune’e sira mós bele hatene. Sira hatene moras COVID-19 ne’e liuhosi sira ninia família katak moras ne’e perigozu. Tanba ne’e sira presiza hatene atubele halo prevensaun”, nia esklarese.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here