lansamentu ba programa kampaña "Impaktu Tabaku ba Saúde", iha Rádiu Komunidade Comoro. Imajen/Osória Marques.

DILI, 08 agostu 2020 (TATOLI)–Jestór Aliansa Nasionál Kontrolu Tabaku Timor Leste (ANKT-TL), Sancho Fernandes, hateten juventude Timor-Leste ne’ebé mak fuma tabaku iha tinan 2020 ne’e redús ona 30% kompara ho antes ne’e iha 45%.

Nia hatutan, maski nune’e dadus ida-ne’e sei hatudu katak juventude Timor-Leste sira fuma sigaru ne’e sei aas tanba ema barak mak sei asesu ba kioske hodi sosa no fuma sigaru.

Notísia Relevante: Kada Tinan, Fumadór Sira Mate 600.000

“Juventude Timor-Leste ne’ebé mak fuma tabaku iha tinan 2020 ne’e redús ona ba 30% kompara ho antes ne’e iha 45%. Maibé sei aas no sai ameasa ida tanba ema barak mak sei asesibilidade ne’ebé fasil hodi asesu ba kioske no sosa baratu ba kada lulun ida,” dehan Jestór Aliansa Nasionál Kontrolu Tabaku Timor Leste (ANKT-TL), Sancho Fernandes,  ba Agência TATOLI hafoin halo lansamentu ba programa kampaña “Impaktu Tabaku ba Saúde”, iha Rádiu Komunidade Comoro, Dili, sesta ne’e.

Foin daudaun, nia hateten, iha klinika la hada’et fó tratamentu ba ema fuma mínimu 65 no tinan ida de’it ema moras hamutuk 34.420, ema 200 ba leten mak mate tanba moras ne’e hosi hipertensaun no stroke.

“Tanba saida ami halo programa ne’e, tanba ita Timor fuma tabaku 75% ema ho idade 15-45, ne’e idade ne’ebé mak sei produtivu no sei halo kontribui buat barak ba ita-nia rai doben Timor ne’e,” nia dehan. 

Atu minimiza aktu fuma sigaru ne’e, ANKT-TL liuhosi servisu hamutuk ho Sekretáriu Estadu Komunikasaun Sosiál (SEKOMS) ho Sekretáriu Estadu Juventude Desportu (SEJD) halo lansamentu ba kampaña desiminasaun “Impaktu Tabaku ba Saúde” ho rádiu komunidade sira.

Objetivu hosi lansamentu ne’e, nia esplika, atu hahú hosi loron ida ohin sei halo kampaña regularmente iha Rádiu Komunidade Comoro kona-ba impaktu Tabaku ba Juventude sira iha Timor-Leste.

“Objetivu ne’e atu hasa’e joven sira-nia koñesimentu tanba ita hakarak ema hotu-hotu iha koñesimentu kona-ba impaktu tabaku ba saúde, nune’e bele ajuda no fó sira kompreensaun kona-ba moras ne’ebé lá hada’et sira, tanba uzu produtu tabaku ne’ebé mak la hada’et,” nia dehan. 

Nia esplika, sira0nia foku mak ba juventude sira tanba ema hotu hatene no akompania katak joven iha Timor-Leste mak fuma no barak fuma tiha ona, entaun ho asaun ida-ne’e mak sira bele hatene hodi bele prevene sira-nia saúde. 

Nia hatutan, sigaru produtu ne’ebé adetivu, pendénsia, droga hodi estraga juventude sira-nia futuru tanba sigaru halo atakasaun ba fuan, kankru, diabetes, respiratóriu króniku, tanba prezentemente impaktu ba liu sira-nia kakutak entaun sira-nia kapasidade atu kapta ba matéria ne’e laiha.

Aleinde ne’e, nia dehan psikolojikamnete estraga sira-nia mentalidade no ema ne’ebé mak hirus no laiha pasiénsia.

“Ho ida-ne’e, ami lansa impaktu tabaku ba saúde ne’ebé hahú iha rádiu komunidade Comoro no hahú hanoin planu atu kontinua servisu hamutuk ho entidade Governu no entidade relevante sira seluk, para informasaun impaktu tabaku tenke desimina to’o iha Munisípiu sira seluk no labele iha Dili de’it,” nia dehan. 

Programa ne’e realiza tanba hetan suporta mós organizasaun internasionál DUnion ho Ministériu Saúde no Rádiu Komunidade Comoro ho orsamentu hamutuk $400.

Notísia Relevante: Loron Mundiál Sein Tabaku 2020: Hatene Ona Tabaku Nia Segredu Foer

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here