DILI, 29 jullu 2020 (TATOLI)-Ministériu Ensinu Superiór Siénsia no Kultura (MESSK) ho Aliansa Universitáriu Timor-Leste, kuarta ne’e halo ona dialogu hodi buka solusaun ba ejijénsia AUTL atu Governu oferese mós subsídiu ba estudante Timoroan iha rai-laran liuhosi aplikasaun propinas gratuita durante implementasaun Estadu Emerjénsia liga ho COVID-19.
Dialogu ne’e hala’o iha edifísiu MESSK Colmera Dili, husi parte MESSK nian reprezenta husi Diretóra Jerál, Maria Filomena Lay.
“Ami nu’udar tékniku Ministériu nian ne’ebé simu orientasaun mai rona de’it ejijensia sira ne’ebé ita-nia alin estudante sira hato’o depois ami sei aprezenta ba Ministru mak iha kompotensia atu deside,” dehan Maria Filomena Lay, ba jornalista sira.
Notísia Relevante :Universitáriu Ejize Subsídiu ba Governu
Maski parte rua seidauk iha desizaun ruma, maibé dialogu la’o iha ambiente ida hakmatek tanba parte rua koopera malu hodi buka solusaun ba kestaun ne’e.
Iha tempu hanesan Reprezentante Potavóz AUTL, Manuel Soares Magno,informa parte rua seidauk iha desizaun final.
“Ami hasoru malu de’it ho Diretóra Jéral Ensinu Superiór, Maria Filomena Lay, nia labele foti desizaun maibé nia promete sei hato’o ejijensia ami nian ba Ministru hodi hetan rezultadu,” tenik tan.
Notísia Relevante :MESSK Hahú Estuda Karta AUTL
AUTL sei konfirma rejultadu dialogu ne’e ho MESSK iha loron 31 fulan-jullu bainhira Ministru la fó resposta.
Notísia Relevante :Governu Aprova Millaun $ 2 Hodi fó Subsidiu ba Estudante
Entretantu, AUTL hato’o ejijensia ne’e relasiona ho desizaun Governu nian hodi oferese subsídiu ba Estudante naun bolseiru Timoroan hamutuk rihun 2-resin durante implementasaun Estadu Emerjénsia iha Timor-Leste.
Jornalista : Tomé Amado
Editór : Agapito dos Santos
