Aliansa Universitáriu Timor Leste (AUTL) .Imajen/Tome Amado.

DILI, 17 jullu 2020 (TATOLI)-Estudante universitáriu ualu ne’ebé hamahan aan iha Aliansa Universitáriu Timor-Leste (AUTL) husu ba Governu atu fó mós subsídiu ba sira hodi selu propinas durante implementasaun Estadu Emerjénsia relasiona ho pandemia globál surtu COVID-19.

Reprezentante AUTL,  Moises Magno, hateten Governu oferese ona subsídiu ba estudante Timoroan iha rai-li’ur maibé tansa la fó mós ba estudante sira iha rai-laran tanba enfreta situasaun hanesan.

Notísia Relevante :Embaixada TL iha Estranjeiru Simu Ona Tranferénsia Osan Subsídiu ba Estudante

“Ita hatene katak maluk estudante naun bolseiru Timoroan sira ne’ebé estuda iha estranjeiru hetan  ona subsídiu COVID-19 nian  tuir kustu moris nasaun ida nian, ami halo de’it komparasaun ba nasaun haat hanesan Estadu Unidus Amerika $1.000, Austrália $500, Itália $500 no Portugal $500”, kestiona Moises Magno, durante konferénsia iha kampus UNTL Dili, sesta ne’e.

Notísia Relevante :Governu Aprova Millaun $ 2 Hodi fó Subsidiu ba Estudante

Estudante sira konsidera desizaun Governu hamosu injustisa hasoru estudante Timoroan ne’ebé estuda iha rai-laran no li’ur.

Notísia Relevante :Estudante Naun Bolseiru husi Nasaun 13 Sei Hetan Subsídiu, Benefisiáriu Iha Indonézia 1.575

“Subsídiu ne’ebé mak maluk estudante naun bolseiru Timoroan sira iha estranjeiru hetan ne’e mesak ukun nain nia oan sira de’it, ne’e duni AUTL husu tan ba Governu atu halo ida ne’e mós ba estudante Timoroan sira iha rai laran”, nia hateten.

Nia dehan, ejizensia AUTL nian maka la hetan responde pozitivu maka tuir nia sei halo audensia ho Ministru Ensinu Superiór Siénsia no Kultura (MESSK), Longuinhos dos Santos, no dala ikusliu maka manifestasaun.

Entretantu, estudante naun bolseiru hamutuk 2-resin iha Indonézia, Austrália, Portugal, Filipina, Estadus Unidus Amérika no seluk tan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here