Parlamentu Nasional. Imajen Tatoli/Egas Cristovão

DILI, 28 jullu 2020 (TATOLI)Capitão Mar e Guerra no atuál Diretór Institutu Defeza Nasionál (IDN), Donaciano Costa Gomes ‘Pedro Klamar Fuik’, hateten durante ne’e fasilidade ba prevensaun surtu COVID-19 iha Timor-Leste depende liu hosi rai-li’ur, ne’ebé dalaruma sei hasoru difikuldade boot bainhira mosu surtu ba vaga daruak, liuliu ba kazu grave.

Iha loron 30 juñu 2020 Primeiru-Ministru, Taur Matan Ruak ofisialmente enserra ona servisu Sala Situasaun Sentru Integradu Jestaun Krize (CIGC, sigla portugés) tanba Governu deside la estende Estadu Emerjénsia ba dahaat.

Maski nune’e, iha tersa ne’e CIGC hamutuk ho Governu relata relatóriu kona-ba implementasaun deklarasaun Estadu Emerjénsia ba Parlamentu Nasionál (PN).

“Konstranjimentu balun ne’ebé maka ita identifika maka ita depende liu ba esteriór, liuliu kona-ba reajente no ekipamentu laboratóriu sira, tanba ita tenke halo konfirmasaun teste ho Universidade ida iha Austrália tanba ita iha ona kompromisu ho sira maski iha situasaun Estadu Emerjénsia tanba ita laiha kapasidade atubele responde rasik,” relata membru CIGC ne’e iha sala plenáriu PN.

Notísia Relevante: Governu Timor-Leste Simu Doasaun Kombate COVID-19 Husi Governu Xina

Governu Timor-Leste Agradese Doasaun Husi Jack Ma no Alibaba Foundation

 Nia dehan, haree ba daudaun ne’e kazu ativu COVID-19 la rejista ona iha rai-laran enkuantu sei eziste iha kuaze nasaun hotu iha mundu, maibé kuandu surtu ne’e rejista tan iha Timor-Leste maka Estadu presiza prepara didi’ak.

“Bainhira akontese filafali no ita la preparadu no mantein nafatin dependénsia ekipamentu hosi estranjeiru maka ita sei iha difikuldade boot ba vaga daruak,” nia akresenta.

Tanba ne’e, Pedro Klamar Fuik konsidera presiza hetan garantia ezisténsia mínimu stock ba ekipamentu luta kontra COVID-19 iha rai-laran, aleinde ajudu hosi parseiru ba kualkér situasaun emerjénsia ba ekipamentu protesaun individuál hanesan ventiladór, tanba daudaun iha de’it ventiladór ida hodi atende ba kazu grave, ne’ebé hetan apoiu hosi Xina.

Antes ne’e, iha loron 4 marsu, Governu Xina fó doasaun dahuluk ba ekipamentu mediku ne’ebé inklui kámara imajen temérmika hodi halo monitorizasaun ba termperatura isin nian.

Iha loron 28 abríl, Governu Repúblika Populár Xina fó doasaun materiál kombate COVID-19 hanesan 42.000 máskara, 40.000 máskara KN95, 4.400 aventál ba protesaun, 4.440 vizeira, 4.400 kapa ba sapatu, 5.000 luvas ba médiku sira, 80 termometru no 90 ventiladór portable.

Nune’e mós, iha loron 26 maiu, empreza xineza, Jack Ma no Alibaba Foundation fó doasaun ba Governu Timor-Leste  hanesan máskara hamutuk 130.00, luvas medisina 20.000, ekipamentu protesaun pesoál 5.000, protesaun ba oin hamutuk 5.010, detections kits 5.088, reajente purifikasaun 5.040, reajente konservasaun amostra 5.000, termómetru 39 no ventiladór hamutuk 10.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here