Materiál doasaun kombate COVID-19 husi Governu Xina to’o iha Aeroportu Comoro ho Aviaun Citilink, tersa (28/04). Imajen Tatoli/António Gonçalves

DILI, 28 abríl 2020 (TATOLI) – Iha tersa lorokraik tuku 16:29, Aviaun Citilink ne’ebé transporta materiál doasaun husi Governu Repúblika Populár Xina hodi kombate COVID-19 to’o iha Aeroportu Internasionál Prezidente Nicolau Lobato, Comoro, Dili.

Materiál ne’ebé to’o iha Timor-Leste maka hanesan 42.000 máskara, 40.000 máskara KN95, 4.400 aventál ba protesaun, 4.440 vizeira, 4.400 kapa ba sapatu, 5.000 luvas ba médiku sira, 80 termometru no 90 ventiladór portable.

Materiál doasaun ne’e rasik, Governu Xina apoiu ba Timor-Leste liuhosi esforsu Ministériu Negósiu Estranjeiru no Kooperasaun (MNEK), hahú loron 28 janeiru 2020 hodi hamutuk ho Governu Repúblika Popular Xina nu’udar meiu atubele kombate hasoru COVID-19.

Iha seremónia entrega materiál ne’ebé hala’o iha Aeroportu Internasionál Prezidente Nicolau Lobato, liuhosi diskursu Embaixadór Xina iha Timor-Leste, Xiao Jiaguo, hateten doasaun ne’e nu’udar apoia daruak nian ne’ebé maka parte Governu Xina fó ba Governu Timor-Leste.

“Apoia ida-ne’e nu’udar apoia ne’ebé maka Governu Xina fó ba Timor-Leste atu oinsá halo prevensaun no kombate COVID-19”, tenik diplomata ne’e.

Embaxador Xina Iha Timor Leste, Xiao Jiaguo.  Imajen Tatoli/Antonio Goncalves

Antes ne’e, iha loron 4 marsu, Governu Xina fó doasaun dahuluk ba ekipamentu mediku ne’ebé inklui kámara imajen temérmika hodi halo monitorizasaun ba termperatura isin nian.

Diplomata Xinez ne’e adianta, apoiu ne’e sei kontinua nafatin nu’udar nasaun amigu.

“Ami kontinua kompromete katak apoia ida ne’e la’ós to’o ba ne’e de’it, maibé apoiu ne’e sei kontinua nafatin entre nasaun rua ne’e”, dehan Embaixadór Xiao Jiaguo.

Iha sorin seluk, Ministru Negósiu Estrajeiru no Kooperasaun, Dionísio da Costa Babo Soares, felisita Governu Xina tanba bele apoia ona Timor-Leste hodi kombate surtu pandemia globál ne’e.

Ministru Negósius Estranjeirus no Kooperasaun, Dionísio da Costa Babo Soares. Imajen Tatoli/Antonio Goncalves

“Lori Governu Timor-Leste nia naran hakarak agradese ba doasaun ida-ne’e. Klaru doasaun ne’e fó ona esperansa ba ita”, dehan Dionísio.

Iha biban ne’e, Ministru Dionísio fó solidaridade ba Governu Xina.

“Ita nian líder Maun Bo’ot sira hanesan Maun Xanana, Prezidente Repúblika, Lú Olo, Primeiru-Ministru, Taur Matan Ruak, hato’o solidaridade ba Governu Xina, no sira hanoin katak hanesan buat ida vale tebes ba sira tanba situasaun hanesan ne’e ita fó solidaridade ba sira, tanba ne’e sira konsidera maka ohin sira fó apoia mai ita”, nia salienta.

Governante ne’e adianta, husi parte Governu Timor-Leste liuhosi Primeiru-Ministru, Taur Matan Ruak nian orientasaun ba MNEK hodi halo komunikasaun ho governu rai-li’ur karik disponível bele apoia Timor-Leste iha situasaun COVID-19.

“Tuir orientasaun Primeiru-Ministru, Ministériu Negósiu Estranjeiru no Kooperasaun tenke halo komunikasaun. Tanba ne’e liuhosi komunikasaun sira ne’e maka Xina halo kedan doasaun”, nia akresenta.

Tuir ministru katak aviaun ne’ebé maka tula ekipamentu hirak ne’e, selu husi Governu Xina.

“Sira nian governu mobiliza sasán husi Xina no ajuda aluga aviaun hodi lori materiál sira to’o iha ne’e, entaun ne’e hatudu katak sira respeita tebes ita-nian país”, Ministru Dionísio akresenta..

Seremonia entrega materiál doasaun husi Xina ne’e, partisipa dhusi Embaixadór Xina ba Timor-Leste, Xiao Jiaguo, Ministru Negósiu Estrajeiru no Kooperasaun, Deonísio da Costa Babo Soares, Ministru Saúde interinu, Bonifácio Maucoli dos Reis, Ministru Transporte no Komunikasaun José Agostinho da Silva, reprezentante husi Organizasaun Mundiál Saúde, inklui reprezentante husi Sentru Integradu Jestaun Krize (CIGC, sigla portugés).

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here