Makleen, Akilis Dias. Imajen/Joanico de Araújo.

DILI, 24 jullu 2020 (TATOLI)—Durante tinan haat eziste nu’udar Agência Noticiosa Timor-Leste (ANTIL) TATOLI,I.P, Agência TATOLI iha ona karáter atu dezenvolve-aan maski hasoru dezafiu oin-oin maibé Agência TATOLI iha ona makleen ka leitór balun nia fuan.

Notísia Relevante: Notísia TATOLI iha Kualidade no Benefísia Makleen Sira iha Área Rurál

Makleen ka Leitór, Akilis Dias, fó sujestaun ba Agência TATOLI atu habelar liras ba munisípiu no notísia labele sentraliza iha Kapitál Dili de’it. Maibé, nia dehan, tanba rekursu naton ka sufisiente ona entaun Agência TATOLI tenke haree mós ba iha munisípiu liuliu iha àrea rurál sira atu foti mós informasaun balu tuir realidade situasaun ekonómi, seguransa, ba povu nia moris loro-loron hodi foka sai atu na’i-ulun sira ne’e haree.

“Ha’u sujere, TATOLI iha ona rekursu naton ka sufisiente ona, haree mós ba munisípiu sira liuliu iha àrea rurál sira atu foti mós informasaun balu tuir realidade ho situasaun ekonómia, seguransa, ba povu nia moris loro-loron nian atu foka sai para ita-nia na’i-ulun sira ne’e haree no tetu,” dehan Makleen, Akilis Dias, ba Agência TATOLI iha nia knar fatin, Servisu Investigasaun Kriminál (SIC, sigla portugés) Nasionál, Caicoli, Dili, kinta ne’e.

Tanba, Akilis Dias hateten, mídia ne’e hanesan ponte ida atu haktuir informasaun ba iha na’i-ulun sira no atu eduka ema sira liuhosi informasaun ne’ebé di’ak. Ba oin, tuir nia, jornalista sira iha Agência TATOLI tenke servisu ho di’ak liután tanba hakarak atu dezenvolve rai Timor-Leste ne’e mídia mós sai parte importante ida.

“Atu fó sai informasaun ba públiku la’os iha Dili de’it maibé informasaun sira iha no hosi munisípiu liuliu iha àrea ruràl sira ne’e mós importante liu. Ita labele foka liu ba Ministru, Prezidente no Deputadu sira ko’alia iha Parlamentu ne’e maibé ita-nia povu aileba iha bàze nia lian laiha mós ladún di’ak. Komunidae sira iha área rurál ne’ebá mós presiza atu hato’o sira-nia mensajen ka hanoin ruma ba ita-nia na’i-ulun sira, oinsà atu dezenvolvimentu ba to’o iha àrea rurál ne’e,” nia fó hanoin.

Notísia Relevante: Notísia TATOLI Sai Referénsia Ba Meiu Komunikasaun Sira Hotu

Nu’udar makleen ida-ne’ebé loro-loron lee notísia iha Agência TATOLI nia portal, nia hateten, bazea ba observasaun ba notísia sira ne’e mesak ho kualidade di’ak no lalais tebes. Tuir nia, buat hotu ne’ebé jornalista sira halibur iha terrenu no públika sai ne’e, halo makleen (leitór) sira mós sente informadu tebes.

“Ha’u sente kontente tebes tanba notísia sira ne’e akuradu tebes ho informasaun ne’ebé kompletu,” nia dehan.

Aleinde ne’e, nia haktuir, buat hotu-hotu la’os la’o di’ak de’it maibé hosi observasaun durante ne’e katak iha mós frakeza, tanba hakarak notísia sira-ne’e públika lalais entaun dalaruma notísia ladún konfirmadu didi’ak. 

Dalaruma, nia informa, notísia ninia títulu balu ladún han malu ho situasaun real no lahan malu ho nia konteúdu jerál. Tanba ida-ne’e, nia dehan, hanesan makleen hakarak ko’alia abertamente de’it atu nune’e bele hadi’a hamutuk tanba buat hotu liuhosi aat mak ba hetan di’ak.

Makleen ka Leitór, Akilis Dias, Imajen/Joanico de Araújo. .

“Ha’u hanesan makleen (leitór) ida, ha’u sujere ba Agência TATOLI nu’udar ajênsia ba Estadu ninian, bainhira hatun notísia ruma labele haree ba lalais ne’e maibé tenke foka liu mós ba oinsá atu ita haree hosi notísia ninia konteudu jerál ne’e. Signifika, ita labele haree hosi fonte ne’e hosi parte ida de’it maibé di’ak liu konfirma mós parte rua ka tolu ne’ebé maka iha laran. Presiza atu iha balansu no espasu di’ak ne’e, iha parte ne’ebé involve iha notisia ne’e konfirma di’ak liután,” nia hateten.

Nia fó sujestaun, servisu iha mídia ne’e prinsipál liu mak servisu ekipa entaun editór tenke kolabora ho jornalista sira iha terrenu, atu ninia konteudu ida iha terrenu ne’e, editór ne’e mós iha koñesementu atu nia halo edisaun karik halo edisaun tuir situasaun real.

Tanba ne’e, nu’udar makleeen ka timoroan ida, nia hato’o mensajen katak tanba Agência TATOLI ne’e mós ajénsia Estadu Timor-Leste nian, entaun nia hato’o ba jornalista sira iha terrenu no ba editór sira katak importante mak notísia ne’ebé públika ne’e labele hatodan ba ema ida maibé tenke imparsial no kredível, atu nune’e hetan fiar hosi makleen sira no tenke asegura nafatin atu ema hotu gosta.

“Nune’e, ema temi de’it TATOLI ne’e, ema labele dehan notísia ida-ne’e Governu nian ne’ebé todan liu ba Governu ka halis ba grupu ida-ne’e ka ne’ebá nian. Maibé, ita tenke sai mídia ida ne’ebé atu akumula informasaun hotu-hotu no ba ema hotu-hotu,” nia dehan.

Iha ámbitu komemorasaun aniversáriu Agência TATOLI ba dahaat ne’ebé monu iha loron 27 fulan-jullu tinan ne’e, nu’udar makleen ida, nia hato’o votus parabens ba Agência TATOLI atu bele dezenvolve-aan, nune’e ba oin bele sai mídia estadu ida ne’ebé di’ak liu iha Timor-Leste.

“Ikus liu, Ha’u hato’o ha’u-nia votus parabens ba Agência TATOLI ne’ebé halo nia aniversáriu ba dahaat (IV) ninian. Ha’u espera, hanesan makleen ida, espesialmente ha’u espera katak Agência TATOLI sei di’ak liután ba oin. Sei la’o neneik maibé tenke la’o beibeik, book-aan ba oin nafatin hodi dezenvolve agência TATOLI ne’e ho di’ak no sai mídia ida ne’ebé di’ak liu iha Timor-Leste,” nia dehan.

Notísia Relevante: PPN Husu TATOLI Públika Informasaun ho Responsabilidade no Rigór

Jornalsita  :  Osória Marques

Editór       :  Cancio Xiemens

HAKEREK NO HATÁN

Please enter your comment!
Please enter your name here