Presidenti Konsellu Imprensa, Virgilio Guterres.Imajen/Antonio Goncalves

DILI, 22 jullu 2020 (TATOLI)- Prezidente Konsellu Imprensa (CI, sigla portugés), Virgílio da Silva Guterres informa katak TATOLI hanesan ajénsia notisioza tenke uluk (fó-sai informasaun) tanba notísia TATOLI sai referénsia ba meiu komunikasaun sira hotu hodi halo kobertura ne’ebé mak profundu liu.

“Tanba ne’e mak, TATOLI nia prezensa importante tebes. Órgaun ida ne’ebé mak moris bazeia ba lei no mós bazeia ba kompromisiu estadu nian atu servi públiku ho informasaun ne’ebé adekuadu atu nune’e kompleta responsabilidade estadu nian no atu fornese informasaun ba públiku”, Prezidente CI Virgílio da Silva Guterres hateten, iha entrevista ho jornalista TATOLI, iha salaun CI, Kintal-boot, Dili, ohin.

Nia hateten, hanesan ajénsia notisioza TATOLI, públiku nia espetativa ne’e maka’as tanba TATOLI nia difuzaun ba informasaun tenke lais liu ho meiu komunisaun hotu-hotu.

Tuir nia observasaun pesoál katak hosi hahú to’o agora, TATOLI iha dezenvolvimentu, liuliu konteúdu ida ne’ebé mak hanesan uluk lian ida de’it maibé agora sai ba lian tolu (3); lian tetún, lain portugés no lian ingléz.

“Entaun hosi ne’e TATOLI komesa diversika ninia iha públiku, tanba ho versaun portugés no versaun ingléz bele taka ona preokupasaun ka ezizénsia públiku uluk nian tanba ita-nia diplomata espatriál sira iha ne’e, ka ita-nia embaixada sira rai li’ur bele hetan informasaun”.

Lider másimu CI ne’e dehan, neineik maibé TATOLI komesa hametin ona ninia kualidade ona; hanesan espresaun ka impresaun públika neineik bele hadook TATOLI tanba ema barak hanoin TATOLI hanesan governu nian, tanba TATOLI sei tutela hela ba Sekretáriu Komunikasaun Sosiál (SEKOMS) nian maibé agora ho performa TATOLI nian, mezmu iha ne’ebá maibé nia independénsia momoos iha ne’ebá.

Lori Konsellu Imprensa nia naran fó parabéns ba TATOLI, hein katak esperiénsia tinan haat liubá bele sai hanesan naroman ida ne’ebé mak leno nafatin ba futuru TATOLI nian, atu nune’e TATOLI sai hanesan lidér XANANA katak tama to’o lidun. Entaun ho ida ne’e, TATOLI mós ikus mai tama to’o lidun. La’ós tama iha lidun estadu Timor nian maibé Estadu Timor Leste nia korespondente sira hotu.

“Hein katak TATOLI iha futuru lais liu iha nia difuzaun, aas liutan iha kualidade no forsa liután iha independénsia editoriál”, dehan.

Parabéns TATOLI. Parabéns ba jornalista TATOLI no parabéns ba diresaun másimu TATOLI nian.

Notísia relevante:Aniversáriu TATOLI, Diretór CNC: TATOLI Foin Harii Nia Ai-rin Sira

Jornalista : Osória Marques

Editór      : Rafy Belo

HAKEREK NO HATÁN

Please enter your comment!
Please enter your name here