Memensio Sequeira Freitas.

DILI, 24 jullu 2020 (TATOLI)–Agéncia TATOLI sei selebra ninia aniversáriu ba dahaat (IV) nian iha loron 27 fulan jullu tinan ida ne’e, hanesan ajénsia ka mídia estadu ne’ebé haklaken liafoun (notísia) sira iha rai laran no ba rai liur liuhosi informasaun sira ne’ebé kredivel ho responsabilidade.

Notísia Relevante: Aniversáriu Agência Tatoli, Ministru Francisco: “Tatoli Tenke Marka Diferensa no Sai Referénsia”

Iha ámbitu komemorasaun aniversáriu ba dahaat ne’e, makleen (leitór) sira iha área rurál hato’o sira-nia observasaun ba publikasaun liafoun sira iha portal Agência TATOLI ne’ebé durante ne’e sira akompaña.

Reprezentante Makleen Sira iha Área RurálMemensio Sequeira Freitas, hateten TATOLI nia notísia sempre hatun iha aspetu hotu-hotu ne’ebé benefísia tebes ba públiku sira liuliu makleen (leitór) sira iha área rurál.

“Ha’u reprezenta leitór hosi área rurál (Ossú-Viqueque) nian katak durante ha’u asesu ba pájina TATOLI katak informasaun no notísia TATOLI nian iha kualidade ne’ebé mak di’ak no TATOLI hatún notísia kuaze iha aspetu hotu-hotu hanesan polítika, edukasaun, ekonomia no kultura. Ne’eduni ha’u bele dehan katak notisia hotu ne’ebé mak publika iha TATOLI ne’e benefísia tebes ba makleen sira, la’ós de’it  iha sidade maibé iha área rurál hotu,” dehan Reprezentante Makleen Sira iha Área RurálMemensio Sequeira Freitas, ba Agência TATOLI iha edifísiu TATOLI,I.P, Farol, Dili, kinta ne’e. 

Nia hateten, TATOLI hanesan mídia esatdu tenke servisu maka’as hodi fornese informasaun ba públiku sira tanba liuhosi informasaun ne’e públiku sira bele adapta sira-nia aan.

“TATOLI hanesan mídia estadu nian ne’ebé mak nia rekursu di’ak loos no kontinua servisu maka’as atu bele fornese informasaun ba ita-nia populasuan sira. Tanba informasaun hotu ne’e, ema hotu bele asesu nune’e sira bele adapta tuir informasaun hirak ne’ebé mak iha,” Memensio hateten.

Nu’udar Makleen no eskritór ida, Memensio mós agradese ba TATOLI tanba bele fó espasu ba nia hodi públika ninia pensamentu liuhosi artigu balun ne’ebe nia hakerek no públika iha TATOLI nu’udar ninia kontribuisaun liuhosi fahe ideia ba makleen sira seluk. 

“Biban ne’e, ha’u hakarak agradese ba TATOLI tanba bele fó opurtunidade ba ami sira ne’ebé mak iha área rurál hodi promove ami-nia profisaun no ami-nia vida hanesan profesór no ami mós bele públika ami-nia pensamentu liuhosi artigu balun iha TATOLI,” nia dehan. 

Dadaun ne’e, nia hateten, TATOLI dezenvolve ona maibé espera katak iha aniversáriu TATOLI nian ba dahaat (IV) ne’e bele halo luan liután servisu TATOLI nian no fornese informasaun di’ak no barak liután atu nune’e ema bele asesu informsaun.

Tanba ne’e, iha aniversáriu Agência TATOLI ba dahaat (IV) ne’e, nia hakarak hato’o parabens no espera  katak TATOLI sei sai ajente ba lia-loos hodi haklaken lia-loos ho loloos no momoos ba ema hotu-hotu.

“Ikus liu, ha’u-nia votu parabens ba aniversáriu TATOLI nian ba dahaat no hein katak TATOLI sempre sai ajente lia-loos ba sidadaun sira hotu ba rai ida-ne’e,” nia dehan. 

Notísia Relevante: Agência TATOLI Públika Informasaun ho Kualidade no Kredível

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here