DILI, 17 jullu 2020 (TATOLI)–Centro Nacional Chega (CNC) hala’o nia misaun hodi prezerva memória pasadu ne’ebé akontese iha tinan 1974 to’o 1999. Memória pasadu sira-ne’e, CNC sei prezerva liuhosi Programa Peskiza Istóriku ne’ebé kompostu hosi mapamentu sítiu istóriku, komunidade ida-Istória ida, istória pesoál, peskiza istóriku, no arkivu no dokumentasaun.

Xefe Departamentu Arkivu Centro Nacional Chega (CNC), Aventino de Jesus Baptista Ximenes, hateten programa ‘Kumunidade Ida-Istória Ida’ ho objetivu prinsipál liu maka oinsá atu halo balansu públiku ba iha partisipasaun ema hotu ninian iha susesu luta ba libertasaun nasionál. 

Notísia Relevante: Mandatu CNC Atu Promove no Disemina Rekomendasaun CAVR “Chega!”

“CNC prezerva prezerva memória pasadu ne’ebé akontese iha tinan 1974 to’o 1999 liuhosi programa Komunidade Ida-Istória Ida. Ezemplu, agora dadauk mós ita hakerek hela boot sira-nia istória, ema kiik sira-nia istória ne’e kuaze la hakerek. Ida-ne’e mak CNC atu oinsá mak prezerva ema hotu-hotu nia istória, ema hotu-hotu nia memória liuhosi sira-nia partisipasaun ba luta ida-ne’e. Uluk, ita dehan katak iha organizasaun rejista iha suku sira-ne’e, iha kontribuisaun pesoál ida-ida ninian,” dehan Aventino de Jesus Baptista Ximenes ba Agência TATOLI iha nia knaar fatin, Antigu Komarka, Balide, Dili, segunda ne’e.

Nia haktuir, ema ida bele ho ninia kondisaun ida iha momentu ne’ebá ho tauk ho traumátiku ho buat sira-ne’e hotu maibé nia konsege kontribui buat balun ne’ebé maka ba iha prosesu luta libertasaun ida-ne’e.

Centro Nacional Chega (CNC), nia dehan, sempre ko’alia katak iha ema balun ne’ebé maka halo toos dook husi sira-nia hela fatin, enatun iha altura ema husu tamba sa mak halo toos ne’e dook hosi hela fatin no toos-na’in hatan resposta simples de’it hakarak ajuda FALINTIL.

“Ha’u tenke kuda ai-han sira-ne’e dook hosi ha’u-nia uma tanba dala ruma FALINTIL sira-nia hahan laiha, sira bele foti hahan ida ne’e. Entaun prosesu ida ita tenke rezerva memória sira hanesan ne’e, maski kiik-oan ida maibé nia valór ne’e boot tebes,” nia dehan.

Iha parte balun, nia haktuir, iha istória pasadu balun hateten katak uluk tiu ida kaer ambulánsia tula lideransa balun ne’ebé mak atu mai halo tratamentu iha vila, nia hatama tiha ba ambulánsia depois halo sirene lian makaas no bainhira to’o iha pós-militár sira-nian, militár haruka liu de’it.

“Entaun, buat hirak hanesan istória ida ne’ebé mak sira fó sira nia-aan ba risku, maibé sira konsege partisipa iha prosesu luta ida-ne’e,” dehan xefe peskiza CNC ne’e.

Nia dehan, ba programa ida-ne’e Centro Nacional Chega (CNC) foin hahú hosi Munisípiu Dili suku haat (4) no tinan oin sei habelar ba suku seluk tan.

“Suku ne’ebé mak iha teritóriu laran ne’e kuaze 400-resin. Tanba suku ida istória ida, nune’e ita sei hetan 400-resin istória kona-ba suku ninian. Maibé, tinan oin sei halo servisu parseria ho universidade sira hodi peskiza no sei entrega hotu ba iha estudante sira mak halo. Espera katak ita bele atinji rezultadu servisu ne’ebé mak tuir númeru suku iha mandatu Centro Nacional Chega ninian,” nia hateten.

Centro Nacional Chega, nia dehan, hahú halo ona induzaun iha Suku Vilaverde, Suku Lahane Osidentál, Suku Dare no semana oin sei hatutan iha Becora. Entaun, tuir nia, suku haat (4) ne’e  mak kontinua nafatin hodi kompleta suku haat (4) ne’ebé mak halo tiha ona iha tinan kotuk.

“Sei kontinua halo planu tanba CNC tenke prezerva istória komunidade ida suku ida. Entaun, ita iha 400-resin suku iha teritóriu Timor Leste. Ha’u hanoin ida-ne’e kobre hotu ba munisípiu sira,” nia dehan.

Nia haktuir, partisipasaun komunidade sira ne’e la’ós ema ida-rua de’it maibé kuaze hotu-hotu maski nia kontribuisaun uitoan. Maibé ninia istória ne’e tenke prezerva, tanba ne’e mak CNC hanaran programa komunidade ida tenki istória ida.

Ba asuntu ida ne’e. nia haktuir, CNC iha kooperasaun servisu di’ak ho diresaun nasionál sira iha ministériu sira iha nasionál no servisu di’ak ho auroridade lokál no munisípiu. Kada munisípiu, organizasaun veteranu sira ne’ebé CNC halo ona koordenasaun servisu ho sira.

Xefe peskiza ne’e dehan, la’o to’o agora seidauk hetan difikuldade ka dezafiu. Maibé iha parte balun ne’ebé CNC labele atinji to’o iha ne’ebá tanba jeografikamente laiha posiblidade tanba iha fatin balun masakre dook hosi estrada.

“Entaun, oinsá ita bele buka meiu ida atu bele to’o duni iha fatin para halo mapamentu sitiu sira hotu. Matéria ida-ne’e sai hanesan apoiu ba iha Ministériu Turizmu Komersiál Industria (MTCI, sigla portugés) atu bele apoiu sira-nia programa ida-ne’ebé hanaran sitíu istóriku,” nia dehan.

Notísia Relevante: CNC Sei Lansa Livriñu “Rekomendasaun Chega! no Per Memoriam Ad Spem”

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here