Diretór Ezekutivu Centro Nacional Chega (CNC), Hugo Maria Fernandes. Imajen/Antonio Goncalves.

DILI, 15 jullu 2020 (TATOLI)–Diretór Ezekutivu Sentru Nasionál Chega (CNC, sigla portugés), Hugo Maria Fernandes, hateten hosi 2017-2020 kompleta tinan tolu maibé CNC servisu hahú iha 2017, CNC nia foku primeiru maka hanesan tuir mandatu oinsá mak promove no monitoriza hodi bele implementa servisu.

“Centro Nacional Chega (CNC) nia servisu durante tinan tolu nia-laran mak oinsá atu promove no monitoriza hodi implementa servisu no disemina informasaun kona-ba rekomendasaun CVAR no papél Chega nian,” dehan Diretór Ezekutivu Centro Nacional, Hugo Maria Fernandes, ba Agência TATOLI liuhosi entrevista iha nia knaar fatin, Antigu Komarka, Balide, Dili, segunda ne’e.

Diretór ne’e fó ezemplu, ko’alia kona-ba progresu sira tanba responsabildade atu implementa ne’e entidade Governu no Estadu ho sosiedade sivíl balun, klaru balun ke CNC implementa ona.

Tuir nia, saida mak CNC halo hosi 2017 mak halo aprosimasaun foti rekomendasaun relatóriu ‘Chega!’ no ‘Per memoriam Ad Spem’ nian ne’e kuaze 220-resin, entaun foti rekomendasaun sira ne’e mai mak CNC fahe ba setór edukasaun, setór justisa, setór saúde, no setór dereitu umanu.

Nia dehan, tuir dekretu-lei 48/2016 hodi harii CNC, Institutu Públiku, ne’ebé mak harii iha 2016 ho dekretu-lei 48/2016, ne’ebé mak tutela deretamenta ba Premeiru Ministru tuir dekretu-lei.

Hugo hakktuir, CNC iha mandatu boot haat primeiru mak atu promove no monitoriza implementasaun dokumentasaun sira hosi CAVR ‘Chega!’ nian no mós rekomendasaun balun ne’ebé mak hanesan mai hosi Comissão Verdade e Amizade (CVA) entre Timor-Leste ho Indonézia.

Segundu, halo rezervasaun ba memória pasadu hodi haree ba asuntu sira relasiona ho fatin istóriku sira no rezervasaun mós liuhosi introdusaun matéria sira iha setór edukasaun no formasaun.

Terseiru, mak rezervasaun mós ko’alia kona-ba polítika atu tulun sobrevivente sira, vítima sira hosi konflitu pasadu nian hosi 1974-1999, atu oinsa mak haree ba vítima sira-nia kondisaun, sá programa mak bele halo apoiu sira no oinsá mak involve sira iha programa Governu nian ba buat sira ne’e hotu.

Kuatru, mak kontinua halo diseminasaun ba relatóriu CAVR “Chega!” no mós relatóriu CVA “Per memoriam Ad Spem” ne’e, iha Timor-Leste no mós iha rai liur ne’ebé mak bolu internasionalizasaun “Chega!” (To’o Ona).

“Enatun ita bazeia ba mandatu boot haat ne’e, ita introdús liuhosi planu estratéjiku iha 2017, bandu CNC hahú iha grupu tékniku ida ne’ebé mak Premeiru-Ministru, Rui Maria de Araújo, iha tempu ne’ebá elabora tiha ona planu estratéjiku ida,” nia dehan. 

Tanba ne’e, nia dehan, iha fulan-jullu 2017 bainhira hahú iha ne’e halo konsellu administrasaun, CNC uza planu estratéjiku ida-ne’e ba iha 2017-2018.

Entaun, nia eplika, iha tinan ida nia laran CNC haree katak iha programa balun ne’ebé maka sai prioridade para implementa maibé balun seidauk sai nu’udar prioridade, entaun iha 2018 halo fali revizaun ba planu estratéjiku ida-ne’e ba tinan haat nian (2018-2022).

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here