Diretór Ezekutivu Centro Nacional Chega (CNC), Hugo Maria Fernandes. Imajen/Mídia CNC.

DILI, 13 jullu 2020 (TATOLi)–Diretór Ezekutivu Centro Nacional Chega (CNC), Hugo Maria Fernandes, hateten aniversáriu CNC ba datoluk iha tinan ne’e ho tema  “Hamutuk Ita Prezerva Memória Ba Esperansa Futuru Nian” ne’e, CNC sei lansa livriñu “Rekomendasaun CAVR “Chega!” no CVA “Per Memoriam Ad Spem”.

” Iha aniversáriu CNC iha loron 17 fulan ne’e, sei lansa livru ne’ebé mak ita-nia Primeiru Ministru, Taur Matan Ruak, hakerek tiha ona ninia prefásiu mak ‘Rekomendasaun Chega! no Per Memoriam Adm Spem’,” dehan Diretór Ezekutivu CNC, Hugo Maria Fernandes, ba Agência TATOLI liuhosi entrevista iha nia knaar fatin, Antigu Komarka Balide, Dili, segunda ne’e.

Nia hatutan, liuhosi livriñu ne’e sei ajuda Governu no Estadu Timor-Leste hodi bele implementa rekoemdasaun hirak ne’e (rekomendasaun Chega! hamutuk 204 no rekomendasaun CVA nian) tuir Governu nia programa prioridade sira.

“Liuhosi livru “Rekomendasaun Chega! no Per Memoriam Ad Spem” sei ajuda ita-nia Governu no Estadu atu nune’e haree loloos ba rekomendasaun saida de’it no saida mak sira sei implementa hosi rekomendasaun ne’e. Depois rekomendasaun sira ne’e balun implementa ona ka balun seidauk,” nia dehan. 

Nia hateten, hosi livru ne’e mak bele hatama ba programa prioridade Governu nian ba kada ministériu. Tanba iha 2018 ne’e, VIII Governu Konstitusionál nian, Primeiru-Ministru foti hosi livru rekomendasaun no sai programa prioridade ba CNC ne’ebé mak ligasaun ho turizmu, edukasaun, no seluk tan.

Aleinde lansa livriñu ida-ne’e, Hugo Maria Fernandes, informa sei lansa mós livru “Hatutan Memória” ba dahuluk hosi estudante na’in-51 ne’ebé mak estudante sira rasik mak halo entrevista no dokumenta hosi sira-nia família (inan-aman) sira.

“Iha loron 17 jullu agora, CNC sei lansa livru ‘Hatutan Mmemória’ ba dahuluk hosi estudante na’in-51 ne’ebé mak sira rasik mak halo entrevista no dokumenta ho sira-nia inan-aman no sira-nia tiuno sira-nia avo, depois mak sira públika,” Hugo esplika. 

Programa hirak ne’e, Hugo Fernandes hateten, bolu naran ‘Memória Transmisaun Jerasional’ hodi estudante sira rona diretamente hosi sira-nia inan-aman maibe sira tulun ona ema hotu nune’e dokumenta tiha. Se lae, tuir nia, tuur iha meza ko’alia tiha, depois aban haluha ka Maromak bolu tiha sira, buat hotu sei la dokumenta.

Nia dehan, liuhusi livru ne’e ajuda ona ema barak atu asesu no lee istória ema seluk nian hodi bele sai memória ida-ne’ebe hosi jerasaun ba jersaun sei labele haluha.

Entretantu, nia hatutan, iha 17 jullu agora ne’e liuliu programa ba aniversáriu CNC nian ba dala-tolu (3) ne’e CNC sei hato’o relatóriu mandatu ezekusaun ba periodu dahuluk nian no mós sei lansa relatoriu tinan tolu nian ba públiku. 

Iha aniversáriu ne’e, Diretór ne’e hateten, CNC sei fahe sertifikadu ba sobrevivente sira ne’ebé mak partisipa ona iha formasaun kona-ba halo negosiu kiik, tanba hosi proograma ne’e mak sobrevive negosiante sira oinsa halo negósiu kiik ne’e.

Iha biban hanesan, nia informa, CNC sei atribui sertifikadu ba estudante na’in-rua (2) hosi Universidade da Paz (UNPAZ) no estudante na’in-ida (1) hosi Universidade Nacional Timor Lorosa’e (UNTL) ne’ebé mak halo peskiza no hakerek sira-nia teze kona-ba ‘Istoria’ no ‘Direitu Umanu’. 

Aleinde ne’e, CNC sei halo lansamentu ba livru ‘Promosaun Turizmu Istóriku’ nian liuliu kona-ba Antigu Komarka Balide nian, tanba ema bele haree no hatene saida mak ema halo iha kormarka ne’e.

“Ho ida-ne’e bele atrai ema hodi vizita Antigu Komarka Balide ne’e,” nia dehan. 

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here