Diretor SAMES, Santana Martins. Imajen/Antonio Goncalves

DILI, 15 jullu 2020 (TATOLI)-Servisu Autónomu Medikamentu no Ekipamentu Saúde (SAMES) iha totál item ekipamentu no medikamentu hamutuk 402, maibé item 372 mak instituisaun ne’e sempre sosa hodi responde ba nesesidade ospitál Nasionál, Referál no Sentru Saúde sira iha Timor-Leste.

Daudaun ne’e SAMES ninia estoke mamuk iha armazén sa’e ona ba pursentu 23 %, kompara ho fulan hirak liubá iha de’it 14 %.

Notísia Relevante :SAMES Prepara Ona Konkursu Públiku Sosa Ai-Moruk Prevensaun Dengue

Medikamentu ninia estoke mamuk iha SAMES maka Parcetamol suppositories 125 ml, Multivitamin syrup Bp boot /60ml, dopamine hcl injection 40 mg/mk amp/5 ml, captopril 50 mg tabs no seluk tan.

”Agora daudaun orsamentu SAMES nian hamutuk millaun $ 3.7 ita halo hotu prosesu aprovizionamentu finál ba faze deliberasaun,  entaun daudaun ne’e stock out ne’ebé mak iha sa’e ba 23% tanba ne’e ai-moruk stock out ne’e komesa mamuk ba beibeik,” informa Diretór Ezekutivu SAMES, Santana Martins, iha Armazen SAMES Kampung-Alor, kuarta ne’e.

Notísia Relevante :Ministra Saúde Foun Sei Konsidera Problema SAMES

Nia parte oras halo hela esforsu ba kontratu anuál sira ne’ebé maka estabelese ona antes ne’e nune’e bele sosa ai-moruk no ekipamentu foun iha tempu badak.

”Ita iha 402 item maibé ita iha 372 item ne’ebé mak ita sempre sosa entaun husi ida ne’e mak 23% stock out ne’e inklui mós ai-moruk esensiál balun,  ita iha ai-moruk lubuk ida inklui ai-moruk espesialista sira-nian ne’ebé mak la sosa tanba orsamentu labele kobre,”tenik Santana.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here