Ministra Saude foun, Odete Maria Freitas Belo. Imajen/Palasiu Sinzas, Ministeriu Saude

DILI, 29 maiu 2020 (TATOLI)-Ministra Saúde, Odete Maria Freitas Belo, hateten iha ninia planu servisu sei fó mós atensaun ba problema ai-moruk no ekipamentu saúde ne’ebé maka Servisu Autónomu Medikamentu no Ekipamentu Saúde (SAMES) enfrenta durante ne’e.

Ministra Saúde hato’o asuntu ne’e hodi responde ba preokupasaun husi Diretór Ezekutivu SAMES, Santana Martins, durante sorumutu dahuluk iha SAMES, Kampung-Alor Dili, sesta ne’e.

Eis Diretóra Ezekutiva SAMES ne’e hatutan, iha ona koiñesementu kle’an kona-ba problema saida de’it maka instituisaun ne’e enfreta durante tinan hirak nia laran.

“Kestiona kona-ba lista esensiál aimoruk konsumiveis hirak ne’e hotu ha’u espera katak ho ha’u nia prezensa iha Ministériu saúde hanesan servisu nu’udar ekipa hamutuk ho Diretór Jerál sira para hatan ba saida mak ohin Diretór Ezekutivu levanta ona,”Informa Ministra Saúde, Odete Maria Freitas Belo.

Iha biban hanesan Diretór Ezekutivu SAMES, Santana Martins, hateten durante enkontru ho Ministra Saúde foun ne’e levanta kona-ba atu hadi’a koordenasaun servisu entre SAMES ho Servisu Ospitalár no Servisu Laboratóriu Nasionál. Nune’e mós kona-ba lista konsumiveis ba ai-moruk no reazente laboratóriu

“Ami husu ba Ministra atu konsidera mak tempu badak ami sei aprezenta ona regulamentu interna SAMES ninian inklui kompleta estrutura Konsellu Diretivu no Konsellu Fiskál ne’ebé mak prosesu la’o hela maibé neneik,”katak Diretór Ezekutivu ne’e.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here