Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão

DILI, 10 jullu 2020 (TATOLI)—Prezidente Komisaun A, Deputadu Joaquim dos Santos, informa Komisaun A (Justisa no Konstitusionál) deside altera títulu anteriór projetu Lei númeru 1/V/2019-“Lei Antí Corrupção (LAC)” ba “Medida Prevensaun no Kombate Korrupsaun” (MPCC-sigla portugés) tanba proposta orijinál laiha matéria prevensaun no deklarasaun bens.

Notísia Relevante: Komisaun A Altera Títulu “LAC” ba “Medidas Prevensaun no Kombate Korrupsaun”

“Ninia substánsia ne’e la’ós ba de’it krime korrupsaun maibé kona-ba atu halo prevensaun para entidade públiku ne’ebé hetan fiar hosi Governu ba halo kna’ar hanesan xefe departamentu, deputadu, ministru, sekretáriu estadu, primeiru-ministru no prezidente repúblika, sira hetan kna’ar ne’e karik, lei ne’e ajuda sira para labele monu ba hahalok ida korrupsaun ne’e. Subtánsia ne’e mak obriga ita muda tiha títulu ba lei “Medida Prevensaun no Kombate Korrupsaun,” dehan Deputadu Joaquim dos Santos ba jornalista sira iha resintu Parlamentu Nasionál, sesta ne’e.

Prezidente Komisaun A ne’e esplika, títulu “Lei Antí Corrupção” muda ba “Medida Prevensaun no Kombate Korrupsaun” tanba uluk proposta orijinál ne’e ko’alia de’it lei kontra korrupsaun, maibé depois halo tiha audiénsia públika no lori ba parlamentu aprova tiha iha jeneralidade, Komisaun A konsege halo tiha textu substitutivu ida.

Komisaun A halo textu substitutivu ne’e, tuir nia, tanba proposta orijinál hosi projetu LAC ne’e laiha materia prevensaun no deklarasaun bens, entaun Komisaun A halo fali formula foun.

Iha formula foun hosi Komisaun A ne’e, nia dehan, kontinua halo peskiza no konsege hamosu kapítulu rua, kapítulu ida ba “Prevensaun Korrupsaun” no kapítulu ida seluk kona-ba “Deklarasaun Bens”.

Notísia Relevante: Komisaun A Konklui Ona LAC, Aban Hatama Relatóriu Finál ba PN

Jornalista : Evaristo Soares Martins

 Editór       :  Cancio Ximenes

HAKEREK NO HATÁN

Please enter your comment!
Please enter your name here