Diskusaun loron ikus ba Lei Anti Corrupção (LAC) ne’ebé hala’o iha Mukit Guest House Aisirimou Aileu. Imajen/Mídia CAC.

AILEU, 09 jullu 2020 (TATOLI)–Iha Diskusaun loron ikus ba Lei Anti Corrupção (LAC) ne’ebé hala’o iha Mukit Guest House Aisirimou Aileu, ohin, deputadu sira hosi komisaun A Parlamentu Nasionál deside hodi altera tiha Titulu anteriór projetu Lei Númeru 1/V/2019-Lei Anti Corrupção (LAC) ba ‘Medidas Prevensaun no Kombate Korrupsaun’.

Tanba ne’e, iha oras ne’e daudaun la’ós ona hanaran “Lei Anti Corrupção (LAC)”  maibé hanaran “Medidas Perevensaun no Kombate Korrupsaun (Medidas de Prevenção e Combate à Corrupção).

Notísia Relevante: Diskusaun LAC, Komisaun A Konklui Lei Krime Korrupsaun

Proposta alterasaun ba títulu ne’e hato’o hosi deputadu proponente na’in-tolu (2) mak hanesan deputadu Francisco Miranda Branco, deputadu Dário Madeira no deputadu Francisco de Vasconcelos.

Iha diskusaun ba proposta altersaun ne’e, Prezidente Komisaun A Joaquim dos Santos ‘Boraluli’ hateten, sínteze hosi debate naruk tinan rua, ne’ebé la fásil, liuhosi testemuña entidade barak ninian maibé la konsege arruma rasosíniu sira no ikus mai hetan duni opiniaun públiku maioria hodi halo ajustamentu atu koloka didi’ak ninia títulu ne’ebé iha proposta ne’e maka “Medidas Prevensaun no Kombate Korrupsaun”.

“Títulu ne’e kobre hotu ona, efeitu sira hotu iha lei ne’e rasik. Tanba ne’e, títulu ne’ebé proponente sira fó ne’e rasionál tebes,” dehan Prezidente Komisaun A Joaquim dos Santos ‘Boraluli’, kinta ne’e. 

Proposta ne’ebé ho númeru 41, data 09/07/ 2020 ne’e pasa iha votasaun ho votus a-favór 7, kontra 0 no abstensaun 0, hosi deputadu komisaun A nia prezensa mak hanesan Prezidente Joaquim dos Santos Boraluli,  Vise-Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Carmelita Moníz, no António Nobre Amaral Tilman.

Iha loron ohin, deputadu komisaun A Parlamentu Nasionál Asuntu Konstitusionál no Justisa, termina no aprova ona projetu Lei Númeru 1/V/I Medidas Prevensaun no Kombate Korrupsaun ho nia artigu hamutuk 120.

Jornalista : Cipriano Colo

Editór      :  Cancio Ximenes

HAKEREK NO HATÁN

Please enter your comment!
Please enter your name here