Reprezentante UNICEF iha TL, Valérie Taton mak entrega ekipamentu prevensaun COVID-19 ba Ministru Edukasaun Juventude no Desportu (SEJD) no Diretór Eskola Domingos Sávio Gusmão, iha eskola Sekundáriu Jerál 10 de Dezmebru Comoro Dili. Imajen/Hortencio Sanchez.

DILI, 09 jullu 2020 (TATOLI)-Ajénsia Internasionál UNICEF iha Timor-Leste, kinta ne’e entrega ekipamentu prevensaun COVID-19 hanesan máskara no balde hamutuk 13.000 ba Eskola Ensinu Sekundáriu Jerál 10 de Dezembru Comoro Dili.

Reprezentante UNICEF iha TL, Valérie Taton mak entrega ekipamentu ne’e ba Ministru Edukasaun Juventude no Desportu (SEJD) no Diretór Eskola Domingos Sávio Gusmão, iha eskola Sekundáriu Jerál 10 de Dezmebru Comoro Dili.

Ministru Edukasaun Juventude no Desportu (MEJD), Armindo Maia, agradese ba apoiu husi UNICEF tanba sei fasilita prosesu aprendizajen ba estudante sira iha ámbitu prevensaun COVID-19.

Notísia Relevante : UNICEF-UE Apoiu Ekipamentu COVID-19 ba Governu

“Agradese ba UNICEF ne’ebé tulun ona eskola hotu liuhosi distribuisaun ekipamentu prevensaun Covid-19 nian, fiar katak ho ajuda hirak ne’e bele tulun ona alunu sira no mestri sira iha eskola ida ne’e,” dehan Armindo Maia, hafoin simu ekipamentu refere.

Iha Biban hanesan Reprezentante UNICEF iha Timor-Leste, Valérie Taton, husu ba dirijente eskola atu jere ekipamentu ne’ebé iha no uza ho koidadu hodi fasilita  estudante no profesór sira bainhira re-ativa ona prosesu aprendizajen.

Notísia Relevante :UNICEF Apoiu Osan Millaun $ 3-Resin ba MEJD

“UNICEF mós kontente tebes hodi apoiu loke fila-fali eskola liuhusi kontribuisaun hodi dezenvolve matadalan sira, oferese ekipamentu hanesan balde rihun sanulu-resin tolu (13.000) mak entrega ba Ministériu Edukasaun ohin loron, no apoia kampaña konsientizasaun fila-fali ba eskola,” katak valérie.

Atu kontribui ba prevene no kombate transmisaun COVID-19 iha eskola sira, reprezentante UNICEF ne’e husu ba estudante sira atu fase liman beibeik ho sabau,uza máskara no matein distansiamentu sosiál.

“Hau hakarak hateten katak ita-nia vijilánsia tuir regulamentu no matadalan sira hato’o husi Ministériu Edukasaun no Ministeriu Saúde, no ita tau hamutuk esforsu sira hodi bele garante ambiente aprendizajen seguru ba labarik sira,” tenik tan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here