Reprezentante Unicef iha Timor Leste, Valérie Taton. Imajen/Egas Cristovão

DILI, 15 maiu 2020 (TATOLI)-Organizasaun Internasionál UNICEF ho Uniaun Europeia, sesta (15/05/2020) entrega apoiu ekipamentu prevensaun surtu COVID-19 ba Ministériu Saúde.

Reprezentante UNICEF iha Timor-Leste, Valerie Tatton, informa fasilidade sira ne’e kompostu husi toa 158,  mikrofon 79 sound system 72 ho ekipamentu seluk tan hodi distribui ba sentru no postu saúde iha territóriu Timor-Leste.

“UNICEF nia kompromisu mak ba oin sei kontinua fó apoiu ba Ministériu Saúde liliu ba parte ida ne’e hodi kontinua halo promosaun no prevensaun nafatin hanesan ita hotu hatene ita la iha kazu maibé ita kontinua halo nafatin prevensaun liliu eduka ita-nia komunidade sira foti konsiénsia atu pratika medida sira hanesan fase liman ho sabaun no mós distansiamentu sosiál no fizíku,” dehan Valerie Tatton hafoin entrega ekipamentu ne’e ba Governu iha Palasiu Sinzas Caicoli, Dili, ohin.

Embaixadór Uniaun Europeia iha Timor-Leste, Andrew Jacobs. Imajen/rnz.co.nz

Iha fatin hanesan, Embaixadór Uniaun Europeia iha Timor Leste, Andrew Jacobs, hateten ho apoiu ekipamentu sei tulun Governu hodi atende problema pandemia globál COVID-19.

“Ami apoiu ekipamentu hanesan toa hamutuk 79 atu distribui ba sentru komunidade ne’ebé iha timor laran tomak hamutuk 70 no sentru saúde sira durante estadu emerjénsia mobilizadór sosiál sira uza toa hodi informa ba populasaun sira kona-ba risku husi coronavirus,”nia akresenta.

Ikusliu, Diretóra Prestasaun Saúde, Odete Viegas da Silva, agradese ba UNICEF ho Uniaun Europeia tanba fó ona apoiu ba Ministériu Saúde hodi atende kazu transmisaun coronavirus iha rai-laran.

“Ami nia agradese ba parseiru sira nia apoiu mós kontribui ba susesu ne’ebé mak daudaun ne’e ita hotu hetan no apoiu sira ne’e la’ós ohin maibé apoiu sira ne’e hahú kedas COVID-19 ne’e mosu liliu Uniaun Europeia atravéz UNICEF no mós parseiru sira seluk ne’ebé mak tulun ona ita,” tenik tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here