Diretór Aprovizionamentu Ministériu Saúde, Bernadino da Silva.Imajen/Felicidade Ximenes.

DILI,09 jullu 2020 (TATOLI)-Ministériu Saúde daudaun ne’e halo ona pagamentu ba kompañia forñesidór hahán  no Otél ne’ebé mak sai fatin kuarentena obrigatóriu durante implementasaun Estadu Emerjénsia liga ho surtu COVID-19 iha Timor-Leste.

Diretór Aprovizionamentu Ministériu Saúde, Bernadino da Silva, garante antes fulan-jullu ramata, nia parte sei finaliza prosesu pagamentu ba kompañia forñesidór no Otél hamutuk 57.

”Catering  ho Otél ne’ebé osan tama ona bankaria mak Time Square ho Helfia no horseik (08/07/2020) tama tan rua maibé ha’u la lembra otél ho catering nia naran,” dehan  Bernadino da silva, ba TATOLI iha ninia servisu fatin Caicoli.

Notísia Relevante : MS iha Ona Faze Konkluzaun Dokumentu ba Otél no Kompañia Forñese Hahán

Prosesu pagamentu ba kompañia no otél durante ne’e atraza tanba sira submete pedidu pagamentu tarde no mós balun dokumentu la kompletu.

Husi Kompañia no Otél 57 ne’e, 23 maka sira-nia prosesu pagamentu haruka ona ba Ministériu Finansa hodi halo tranferénsia osan, sira seluk  balun seidauk  submete pedidu pagamentu ba MS.

Notísia Relevante :MS Hetan Fundu COVID-19 Hamutuk Millaun $ 58-Resin

”Kompañia ne’ebé mak Ministériu Saúde kontratu durante Estadu Emerjénsia ne’e hamutuk 57 husi otél hamutuk 25 no husi catering 26 no mós iha kompañia seluk tan,” tenik Diretór Aprovizionamentu.

Totál orsamentu ne’ebé maka ministériu Saúde aloka hodi selu Otél no Kompañia 57 ne’e hamutuk millaun $ 2.500.

Aleinde submete dokumentu tarde, nia dehan iha mós kompañia balun dokumentu la kompletu nune’e hodi implika ba prosesu pagamentu tenki la’o neneik.

”Ami elabora ninia prosedimentu legál kona- ba kontratu hanesan dokumentu komprovativu hanesan sasán faktu sira ne’ebé simu husi hahán no mós haree otél sira hanesan ema hira mka tama iha kuartu otél entaun verifikasaun loos ona mak hafoin Diresaun Finansas Ministériu Saúde sei enkamiña ba iha sentrál Ministériu Finansas depois Ministériu Finansas verifika loos mak pagamentu ba kompañia sira, se haree mak la loos sira fó fila mai iha Ministériu Saúde hodi verifika entaun husi ida ne’e mak prosesu kleur,” katak Nia.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here