Osan Dolar Amerikanu. Imajen/Google

DILI, 14 maiu 2020 (TATOLI)-Governu liuhosi Ministériu Finansa aloka ona orsamentu hamutuk millaun $ 58.099.250 husi fundu COVID-19 ba Ministériu Saúde hodi ezekuta ba programa bens servisu, kapitál menór, transferénsia públika no kapitál dezenvolvimentu.

Diretór Nasionál Planu Finansa, Ministériu Saúde, Marcelo Amaral, informa foufoun ministériu Finansa aloka orsamentu hamutuk millaun $ 52 ba Ministériu Saúde no millaun $ 6-resin transfere ba Ministériu Turizmu Komérsiu no Indústria (MTKI) atu halo pagamentu ba Otél sira ne’ebé Governu aluga hodi sai fatin kuarentena obrigatóriu no Kompañia forñese hahán.

Maibé MTKI la konsege ezekuta hodi haruka filafali ba konta Ministériu Saúde maka sei ezekuta tanba ne’e soma hamutuk sai millaun $ 58.099.250.

“Husi totál orsamentu $ 58.099.250 ne’e aloka ba bens servisu millaun $ 21.479.250, trasferénsia públika millaun $ 16.975, kapitál menór millaun $ 8.910, no mós kapitál dezenvolviementu $ 10.735,” relata Diretór Marcelo Amaral, ba TATOLI, via TATOLI, kinta (14/05/2020) via telefone.

Ho orsamentu hirak ne’e MS sei halo pagamentu ba otél no kompañia forñese hahán sira ne’ebé maka presta ona servisu ba governu durante ne’e.

Iha fatin seluk, antes ne’e, Vise Ministru Estratéjiku Dezenvolvimentu Saúde, Bonifácio Maucoli dos Reis reforsa husi montante orsamentu ne’e sei selu subsídiu ba profisionál saúde, otél no kompaña forñese hahán sira.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here