Prezidente Conselho de Imprensa, Virgilio Guterres. Foto Tatoli

DILI, 09 jullu 2020 (TATOLI)—Prezidente Conselho de Imprensa (CI), Virgílio da Silva Guterres “Lamukan”, kontinua husu ba Governu liuhosi Ministériu Justisa (MJ) lideradu Manuel Cárceres atu kansela tiha esbosu lei kriminaliza difamasaun tanba la fó benefísiu ba povu Timor-Leste.

Notísia Relevante: CI iha Papél Importante Kontra Esbosu-Lei Kriminaliza Difamasaun

Virgílio “Lamukan” hateten, se avansa ho lei kriminaliza difamasaun, ida ne’e hanesan hakiduk boot ida ba prosesu demokrasia iha Timor-Leste no viola konstituisaun RDTL.

Tuir nia, lei kriminaliza difamasaun ne’e mós sei la respeita prinsípiu sira-ne’ebé uluk timoroan sira kompromete ona atu halo-tuir prinsípiu internasionál, liuliu parte direitu umanu, direitu sivíl no polítiku, tanba deklarasaun universál direitu umanu ne’ebé ke Timor-Leste adopta iha konstituisaun RDTL.

“Se esbosu ne’e sai lei, atu jornalista ka atu ativista mós sei susar atu hato’o opiniaun. Solusaun mak kansela. Esbosu ne’e gasta tempu de’it. Gasta enérjia. Depois, ita diskute buat ne’ebé ke ikus mai la fó benefísiu ba ita. Esbosu ne’e hatún ita-nia dignidade hanesan nasaun iha mundu tomak no sosiedade demokrátiku labele iha krime polítiku, labele iha prizioneiru polítiku tanba demokrasia ema hotu livre atu hato’o sira-nia opiniaun,” Prezidente Conselho de Imprensa (CI), Virgílio da Silva Guterres “Lamukan”, informa ba jornalista sira, iha estrikóriu Konsellu Imprensa, Kintál-Boot, Dili, kinta ne’e.

Nia hatutan, bainhira nasaun ida iha dadur polítiku entaun nasaun ne’e la’ós demokrátiku tanba iha demokrasia só dadur mak ema sira hanesan droga no oho ema.

“Bainhira iha ona prizioneiru polítiku, entaun ó-nia Ministru Negósiu Estranjeiru no Kooperasaun ba Organizasaun Nasaun Unida (ONU) ne’ebá ema sei kestiona beibeik, ó-nia Prezidente Repúblika ba liúr mós ema sei kestiona,” nia dehan.

Nune’e mós, nia hatutan, Cruz Vermelha Internasionál ne’ebé uluk vizita prizioneiru polítiku sira iha Indonézia nia tempu ne’e, sei mai fila-fali atu ko’alia ho Prezidente Repúblika no Primeiru-Ministru atu ba vizita dadur polítiku sira. Tanba, dadur polítiku sira-nia estatutu ne’e lei internasionál proteje atu hetan vizita hosi organizasaun internasionál hanesan ICRD.

“Hanesan ema ne’ebé uluk sai dadur polítiku, ha’u lakohi Timor ne’e iha tán dadur polítiku ida. Dadur mak ema sira-ne’ebé halo violénsia, ema sira-ne’ebé komete kazu insestu,” nia haklaken. 

Prezidente Konsellu Imprensa ne’e halo predisaun, bainhira Ministru Justisa ‘obriga-aan’ avansa esbosu ne’e, sei iha reasaun maka’as hosi públiku.

Notísia Relevante: CI Konsidera Lei Kriminaliza Difamasaun Kontra Espíritu Konstituisaun RDTL

Jornalista : Evaristo Soares Martins

Editór        :  Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here