Deputadu Bankada CNRT, Adérito Hugo da Costa. Imajen Tatoli/ Egas Cristóvão

DILI, 01 jullu 2020 (TATOLI)—Membru Bankada Congresso Nacional da Reconstrução de Timor (CNRT), Deputadu Adérito Hugo da Costa, hateten iha situasaun atuál Conselho de Imprensa (CI) iha papél importante kontra tentativa sira-ne’ebé atu introdús esbosu-lei kriminaliza difamasaun.

“Iha situasaun ida agora ho diskusaun sobre kriminalizasaun ba difamasaun nian, ha’u hanoin katak Conselho de Imprensa (CI) iha papél importantísimu tebes hodi enfrenta tentativa sira atu introdús kontra produtivu ho ita-nia definisaun Konstituisaun RDTL artigu 40 no artigu 41. Tanba dezde restaurasaun independénsia, ita tane-aas tebes, ne’e mak halo ita-nia setór komunikasaun sosiál la’o di’ak tebes iha rai-laran,” dehan Deputadu Adérito Hugo da Costa, ba jornalista sira, iha resintu Parlamentu Nasionál, kuarta ne’e.

Eis Jornalista ne’e fó hanoin, ho debate esbosu-lei kriminaliza difamasaun ne’ebé oras ne’e la’o iha sosiedade tenke presiza kompozisaun Conselho de Imprensa (CI) ida forte hanesan kompozisaun antes ne’e hodi halo debate ho Governu kona-ba inisiativa hosi Ministériu Justisa ne’e.

Iha parte seluk, Deputadu Bankada CNRT ne’e fó-sai katak reprezentasaun parlamentu nasionál na’in-rua ba CI oras ne’e sei iha prosesu negosiasaun.

“Karik, semana oin bele iha ona prosesu. Tanba, oras ne’e, prosesu negosiasaun la’o hela. Espera, segunda bele ajenda ona hodi bele halo eleisaun. Em prinsípiu Bankada CNRT ne’ebé durante ne’e akompaña dezenvolvimentu institusionál, iha preferénsia ba profisionál setór meiu komunikasaun sosiál nian no rekursu umanu ne’ebé ami akompaña mandatu Konsellu Imprensa ida liu bá, ne’ebé hahú funsionamentu Konsellu Imprensa no hala’o kna’ar ho di’ak tebes,” nia dehan. 

“Ami Bankada CNRT ho 21 kadeira, iha ne’e kontinua konsistentemente atu akompaña dezenvolvimentu instituisionál sira-ne’e, espesialmente ba Konsellu Imprensa,” nia hateten. 

Deputadu Adérito Hugo hanoin, sé-sé mak ba iha Conselho de Imprensa (CI) tenke reprezenta duni komunidade mídia iha Timor-Leste. Depois, tuir nia, lori aspirasaun mídia ninian ba iha konsellu ne’e hodi kontinua halo regulamentasaun ba serbisu mídia nian ne’ebé ke mais profisionál, neutru, nune’e kontribui ba dezenvolvimentu nasaun nian.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here