Deputadu sira hosi Komisaun A PN hala'o diskusaun ba LAC iha iha Mukit Guest House Aisirimou Aileu, sesta (03/07/2020). Imajen/Mídia CAC.

AILEU, 04 jullu 2020 (TATOLI)–Governu liuhosi Vise Ministru Justisa, José Edmundo Caetano, konsidera Lei Anti Corrupção (LAC) fó podér ba Comissão Anti Corrupção (CAC) atu haforsa liu tan servisu kombate korrupsaun iha Timor-Leste (TL).

Notísia Relevante: Governu Konsidera LAC Sei Fó Poder ba CAC Kombate Korrupsaun

“Em prinsípiu, lei ne’e nesesáriu duni atu halo prevensaun liuliu kombate korrupsaun iha Timor-Leste. Tanba ne’e, lei ne’e rasik sei fó podér tomak ba CAC atu forsa liután iha ninia servisu, liga ho prevensaun no seluk tan,” José Edmundo hato’o asuntu ne’e, hafoin reprezenta Governu hodi partisipa diretamente iha diskusaun ba LAC ne’ebé hala’o durante loron haat (1-4 jullu) iha Mukit Guest House Aisirimou, Aileu, sábadu ne’e.

Governante ne’e otimista katak, prezensa LAC ne’e sei tulun duni no haforte liután instituisaun CAC, hodi halo identifikasaun liga ho informasaun sira korrupsaun nian ne’ebé durante ne’e sai mós hanesan preokupasaun sosiedade Timór.

José Edmundo rekoñese no fó ezemplu, katak iha Timor-Leste mosu duni klase sosiál hanesan ema balun ki’ak ne’e ki’ak duni maibé iha klase ida ne’ebé hatudu katak ema riku ne’e riku duni.

Husi klase sosiál ne’ebé iha, nia dehan, dala barak sosiedade julga ema riku sira balun dehan kata, riku soin ne’ebé iha mai hosi dalan korrupsaun, maski laiha provas ida-ne’ebé bele justifika katak riku soin ne’ebé iha mai hosi korrupsaun.

Tuir ninia observasaun, deputadu sira husi Komisaun A Parlamentu Nasionál hamutuk ho entidade relevante sira diskute kle’an duni, hodi tetu,  deside no refleta realidade Timor nian no mós sempre konsidera Konstituisaun Repúblika Demokrátika Timor-Leste nian.

Entretantu, progresu diskusaun Projetu Lei númeru 1/V/I- Lei Anti Corrupção (LAC), oras ne’e daudaun, Deputadu sira husi Komisaun A Parlamentu Nasionál (PN), hamutuk ho entidade relevante sira liu-hosi diskusaun kle’an no konsege aprova ona kapítulu Primeiru (I), kona-ba medida Jerál Sira Prevensaun Nian, ho nia sesaun hitu (VII), ne’ebé kompostu husi artigu 25.

Alende ne’e, konsege finaliza no aprova tan titulu I medidas kombate korrupsaun,  kapitulu  II kona-ba Rejime Deklarasaun Bens no Interese, ne’ebé iha sesaun VII ho nia artigu hamutuk 33.

Komisaun A mós diskute ona lei krime korrupsaun nian, ne’ebé ho nia kapitulu hamutuk VI (neen), iha artigu hamutuk 47, no prosesu diskusaun ne’e, to’o ona kapitulu II kona-ba apresiasaun nian, to’o artigu 25, ne’ebé tuir planu, Komisaun A hamutuk ho entidade relevante sira sei kontinua deskuti iha semana oin, iha Mukit Guest House Airimou Aileu.

Jornalista : Cipriano Colo

Editór      :  Cancio Ximenes

HAKEREK NO HATÁN

Please enter your comment!
Please enter your name here