Deputadu sira hosi Komisaun A Parlamentu Nasionál hamutuk hoentidade relevante sira kontinua halo diskusaun terseira faze ba projetu Lei Númeru 1/V/2019-Lei Anti Corrupção (LAC), iha Mukit Guest House Aisirimou, Aileu. Imajen Tatoli/Cipriano Colo.

AILEU, 07 jullu 2020 (TATOLI–Hafoin halo aprovasaun ba  titulu I medidas kombate korrupsaun,  kapitulu  II kona-ba Rejime Deklarasaun Bens no Interese hosi projetu Lei Númeru 1/V/2019-Lei Anti Corrupção (LAC) iha loron 3 fulan jullu tinan ne’e, ohin, deputadu sira hosi komisaun A Parlamentu Nasionál hamutuk ho entidade relevante sira kontinua halo diskusaun ba Lei Krime Korrupsaun iha projetu LAC.

Notísia Relevante: LAC Haforsa CAC Buka-Tuir “Ema-Ne’ebé Riku-Matak Derrepente”

Lei Krime Korrupsaun ne’e kompostu hosi  kapitulu neen (VI), ho nia artigu hamutuk 47. Diskusaun ne’e hahú hosi kapitulu I kona-ba krime korrupsaun sesaun I ko’alia kona-ba krime korrupsaun pratikadu iha ezersísiu funsaun públika sira.

Sesaun ne’e iha artigu hamutuk 11 mak hanesan, artigu 1 kona-ba korrupsaun ka subornu passiva hosi funsionáriu iha aktu ilísitu, artigu 2 kona-ba korrupsaun ka subornu passiva hosi funsionáriu iha aktu lísitu, artigu 3 kona-ba korrupsaun ka subornu ativa hosi funsionáriu, artigu 4 kona-ba pekulatu, artigu 5 kona-ba pekulatu uzu nian, artigu 6 kona-ba atentadu ba diretu partisipasaun no igualdade hosi kandidatu sira iha konkursu aprovizionamentu, venda ka konsesaun, artigu 7 kona-ba abuzu podér, artigu 8 kona-ba partisipasaun ekonómika iha negósiu, artigu 9 kona-ba konflitu intereses, artigu 10 kona-ba agravasaun, artigu 11 kona-ba konseitu funsionáriu.

Sesaun II, Krime sira Korrupsaun pratikadu iha ezersísiu funsaun privada sira, artigu 12 kona-ba korrupsaun ka subornu passiva ba sira ne’ebé ezerse funsaun iha setór privadu, artigu 13 kona-ba korrupsaun ka subornu ativa ba sira-ne’ebé ezerse funsaun iha setór privadu, artigu 14 kona-ba pekultu iha setór privadu.

Sesaun III- Krime Korrupsaun Sira Seluk, artigu 15 kona-ba tráfiku influensia, artigu 16 kona-ba subornu kontra realizasaun justisa, artigu 17 kona-ba obstrusaun ba produsaun prova nian, artigu 18 kona-ba obstrusaun ba atividade majistradu ka funsionáriu, artigu 19 kona-ba fraude iha konstrusaun, artigu 20 kona-ba obstrusaun ka afastamentu husi konkorrente aprovizionamentu ka venda públika, artigu 21 kona-ba falta deklarasaun bens, rendimentus no intereses, (artigu ne’e (21) elimina tiha tanba kontempla ona iha testu anteriór kona-ba rejime deklarasaun de bens no intereses ne’ebé arova tiha ona iha diskusaun semana kotuk.

Deputadu proponente ba eliminasaun artigu 21 mak hanesan deputada Carmelita Caetano Moniz, deputadu Francisco Miranda Branco no deputadu Dário Madeira, ho proposta númeru 35 data 07/07/2020, ne’ebé aprova unanimidade hosi deputadu Komisaun A prezente hamutuk na’in-sia (9) ho votus a-favór 9, abstensaun 0 kontra 0,  artigu 21 kona-ba pose ba rikeza naun justifikada, artigu 22 kona-ba brankeamentu.

Iha parte loraik, deputadu sira sei kontinua diskute Kapitlu II-Apresiasaun artigu 23 ne’ebé ko’alia kona-ba apresiasaun prosedimentu kriminál, artigu 24 kona-ba apresisaun hosi Pena.

Deputadu sira hosi Komisaun A Parlamentu Nasionál Asuntu Konstitusionais no Justisa ne’ebé partisipa iha dikusaun ne’e mak hanesan Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes, Carmelita Moníz, Óscar de Araújo no António Nobre Amaral Tilman.

Entidade relevante sira ne’ebé partisipa mós iha diskusaun ne’e mak hanesan Adjuntu Prokuradór Jerál Repúblika Alfonso Lopez,  Estrutura CAC kompostu husi komisáriu Sérgio Hornai, Komisáriu Adjuntu Augusto Castro ho Luis Sampaio, Komisáriu Adjuntu CAC ba asuntu Servisu Apoiu no Kooperasaun (SAC), Alexandre Freitas, akompaña hosi Asesora Jurídika Mariman Oliveira, Diretór Polisia Sientifika Investigasaun Kriminál (PSIK), Vicente Fernandes Brito, adjunta defensora jerál públika Olga Berreto Nunes no Asesór Jurídiku Komissaun A Parlamentu Nasionál, Anildo da Cruz ho Pedro Andrade.

Notísia Relevante: LAC Artigu 26 Kontrola Ema ho Kargu Públiku Nia Rikusoin

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here