Diretora Ezekutivu Fundu Dezenvolvimentu Kapitál Umanu (FDCH, sigla portugés), Lelia Carceres dos Santos. Imajen/Osória Marques.

DILI, 08 jullu 2020 (TATOLI)–Diretora Ezekutivu Fundu Dezenvolvimentu Kapitál Umanu (FDCH, sigla portugés), Lelia Carceres dos Santos, hateten FDCH implementa programa estájiu professionál ba bolseiru graduadu sira ne’ebé mak seidauk hetan servisu.

Notísia Relevante: Investimentu Kapasitasaun Ba Funsionáriu Públiku no Bolsu Estudu Atinje 80%

Nia hatutan, iha programa estájiu prefessionál ne’e bolseiru sira ne’ebé mak gradua ona iha 2019 purvolta 150 maibé seidauk hetan servisu, tanba ne’e atu akomoda sira ba iha ministériu sira.

“Programa estájiu professionál ba bolseiru graduadu sira, agora dadaun, ita tau ona sira balun iha Institutu Petróleu no Jeolojia (IPG, sigla portugés), Universidade Timor Lorosa’e (UNTL), Autoridade Inspesaun no Fiskalizasaun ba Atividade Ekonómika Sanitária no Alimentar, Institutu Públiku AIFAESA. Sira iha AIFAESA konsege prenxe vaga no agora sira servisu ona iha ne’ebá,” Diretora Ezekutiva FDCH, Lelia Carceres dos Santos, ba jornalista sira iha Salaun Palásiu das Cinzas, Caicoli, Dili, tersa ne’e. 

Bolseiru hirak ne’e, nia dehan, hirak ne’ebé seidauk hetan servisu ne’e, FDCH ba bolu no rejista sira-nia naran para lori sira tau iha ministériu sira tuir duni sira-nia área servisu durante fulan neen (6) hodi bele manan esperiénsia.  

Nia dehan, implementa programa bolsu estudu ba públiku ne’e, FDCH kontinua akompañia no apoiu nafatin bainhira ramata ona estudu mak seidauk iha servisu.

Notísia Relevante: Governu Sei Realiza Estájiu Profisionál Ba Bolseiru Sira

“Hala’o programa estájiu professionál ne’e ita nunka husik ema ida iha kotuk maibé ita sempre fó apoiu,” nia hateten.

Agora dadaun, nia dehan, FDCH kontinua tenta atu mellora liután no fó planu bolsu estudu ba kada ministériu sira no ministériu mak identifika nia funsionáriu sira atu tuir.  

“Se ko’alia ho funsionáriu públiku sira iha kada ministériu sira ne’e, ministériu mak identifika nia funsionáriu sira. Tanba, ministériu ne’e hakarak sira estudu hotu, fila-mai tenke prenxe fali ba vaga ministériu ne’e rasik,” nia dehan.

Notísia Relevante: FDCH Implementa Programa Estájiu Profisionál Ba Bolseiru 100

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here