Diretora Ezekutivu Fundu Dezenvolvimentu Kapitál Umanu (FDCH, sigla portugés), Lelia Carceres dos Santos. Imajen/Osória Marques.

DILI, 08 jullu 2020 (TATOLI)–Diretora Ezekutiva Fundu Dezenvolvimentu Kapitál Umanu (FDCH, sigla portugés), Lelia Carceres dos Santos, hatete hosi tinan 2011-2020, investimentu kapasitasaun ba funsionáriu públiku no ho bolsu estudu atinje 80%.

“Hahú tinan 2011-2020, investimentu kapasitasaun ba funsionáriu públiku no bolsu estudu atinje 80%. Tanba ne’e mak dekretu lei atu di’ak liután mekanizmu koordensaun para depois ita mós hanoin ona investimentu ba ita-nia instituisaun fornesedór iha rai-laran hanesan INAP,” dehan Diretora Ezekutiva FDCH, Lelia Carceres dos Santos, ba jornalsita sira iha serimónia sensibilizasain Dekretu Lei N13/2020, 15 Abril-Regulamentu Fundu Dezenvolvimentu Kapitál Umanu, iha Salaun Palásiu das Cinzas, Caicoli, Dili, kuarta ne’e.

Nia hatutan, Institutu Nasionál Administrasaun Nasionál (INA) INAP mós bele fasilita formasaun ba funsionáriu sira atu tuir formasaun iha rai laran ka rai luir karik ema barak liu, bele bolu ema ida-rua ne’ebé mak área espesializda hosi rai liur mai hodi fó formasaun ba benefisiária sira.

Bainhira atu foti área espesializada ne’e tenke ministériu mak hili no sira mak hatene di’ak liu, entaun sira mak tenke identifika. Maibé parte FDCH nia mak fó sai katak, purezmplu Ministériu Agrikultura foti lisensiatura hira no nivél diploma hira mak ba tuir bolsu estudu, sira fila bele ajuda fali instituisaun relevante.

“Ho ida-ne’e, Governu rasik iha hanoin atu fó bolsu estudu maibé ita seidauk iha serteza katak implementa ka oinsá tanba ita mós hanoin hela, tanba ita agora iha situasaun pandemia COVID-19,” diretora ezekutivu informa.

Nia dehan, osan dotasaun fulan-fulan ne’ebé atribui ba FDCH mak purvolta $1.6 maibé la’ós ba fundus de’it maibé ba programa hotu iha FDCH nian.

“Programa iha FDCH mak hanesan programa formasaun profesionál, formasaun téknika, bolsu estudu no tipu seluk hosi formasaun ne’e. Ita sei mantein osan ne’ebé pasadu ka tinan kotuk nian,” Lelia alerta.

Nia hateten, osan purvolta $7000-resin ba totál benefisiáriu ne’ebé mak tuir bolsu estudu iha rai liur purvolta $5000-resin maibé ida ativu hela mak 1200-resin.

Iha pandemia COVID-19, nia dehan, prosesu aprendizajén ba bolsu estudu ba veteranu kombatente nia-oan sira iha Surabaya no Bali (Indonézia) to’o fulan janeiru sira hala’o aprendizajén liuhosi online de’it.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here