Sekretáriu Ezekutivu FDCH, Isménio Martins da Silva. Imajen Egas Cristovão

DILI, 19 agostu 2019 (TATOLI)-Husi Bolseiru timoroan 5.600, bolseiru na´in 100 ne´ebé ramata ona sira-nia estudu iha rai li´ur, oras ne´e, hala´o hela estájiu profisionál husi programa pilotu ne´ebé Fundu Dezenvolvimentu Kapitál Umanu (FDCH-sigla portugés) kria, atu nune´e bele ajuda abilidade bolseiru sira nian bainhira kompete iha merkadu traballu.

Sekretáriu Ezekutivu FDCH, Isménio Martins da Silva hateten, programa pilotu ne’e rasik atu ajuda bolseiru sira hodi hetan esperiénsia  no koñesementu kle´an iha área funsionamentu administrativu husi setór privadu no governu.

“Ita implementa uluk programa pilotu ne’e, bolseiru estajiáriu profesionál 100, atu bele hetan abilidade. Tanba sira ne’e la´ós funsionáriu entaun ita hakarak tulun sira molok atu hetan serbisu, sira bele iha ona koñesementu,” tenik Sekretáriu Ezkutivu FDCH ba jornalista Ajénsia TATOLI iha Salaun Sentru Koñesimentu, FDCH,  Eis-edifisiu Ministériu Finansa, segunda (19/09/2019).

Bolseiru estajiáriu profisionál sira ne’e, tuir Sekretáriu Ezekutivu ne´e katak FDCH apoiu ho subsídiu de’it tanba sira la´ós funsionáriu. Tan ne’e sira hetan subsídiu hodi troka fali kustu ba transporte no hahán ne’ebé sira gastu iha tempu estájiu.“Ita apoiu osan subsídiu ba sira tuir estandarizasaun nível sálariu mínimu atu fasilita sira hodi hetan  koñesementu kle´an iha area funsionamentu administrativu setór privadu no mós governu”.

Nia reforsa, bolseiru 100 ne’ebé hala´o daudaun estájiu profesionál iha instituisaun publika no privadu no governu kuake 75%  ne’e maioria husi área profesionál saúde nian hetan hotu ona servisu.

Ne’e duni, politikamente kuandu programa ne’e mak hetan progresu tinan oin, FDCH sei kontiua tan ho bolseiru 100.

“Maibé ami sei haree fali orsamentu ba tinan oin hahú husi janeiru, kuandu disponível, ami sei kontinua apoiu tan bolseiru 100 hodi atinji tan programa ne’e,” garante Sekretáriu Ezekutivu, Isménio Martins.Sekretáriu ne’e mós reforsa tan katak programa pilotu ne’e nu´udar opsaun ida atu loke oportunidade ba bolseiru sira iha rai laran. “Tan ne’e tinan oin sei haree tan sira ne’ebé eskola iha rai laran atu hetan mós estájiu profesionál,” nia konklui.

Notísia relevante:FDCH ho ANATL Anúnsiu Oportunidade Bolsu Estudu Ba Timoroan

Jornalista :Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here