Deputadu hosi Komisaun A hamutuk ho entidade relevante sira kontinua diskute artigu 34 ne’ebé ko’alia kona-ba deklarasaun agregadu familiar, iha Mukit Guest House, Aisirimou Munisipiu Aileu. Imajen Tatoli/Cipriano Colo.

DILI, 05 jullu  2020 (TATOLI)–Lei Anti Corrupção (LAC) artigu 26 fó kompeténsia ba orgaun kompetente hodi halo kontrolu no halo monitorizasaun ba ema ne’ebé asume kargu públiu ninia rikusoin, hosi hahú no durante hala’o to’o ramata ninia mandatu.

Komissaun A Parlamentu Nasionál asuntu konstitusionál no justisa hamutuk ho entidade relevante sira diskute no aprova ona artigu ne’e, hamutuk ho artigu 24 ne’ebé pertense ba projetu lei númeru 1/V/I-Lei Anti Corrupção, titulu I medidas prevenção kapitulu II Rejime Deklarasaun Bens no Intereses.

Molok diskute no halo aprovasaun ba artigu ne’e iha Otél Uma Liurai Babulo Manufahi, 26 juñu tinan ne’e, asesór Jurídiku Komissaun A Parlamentu Nasionál, Anildo da Cruz esplika katak, artigu ne’e ko’alia kona-ba deklarasaun propriedade ne’e iha ninia objetivu tolu mak hanesan halo kontrolu, deteta no prevene konflitu interese hosi ema ne’ebé asume kargu públiku.

Segundu maka, halo monitorizasaun, akompañamentu ba aumentu riku soin, atu bele deteta kuandu ajente publiku ida ninia riku soin aumenta makaas iha tempu badak nia laran, CAC tenke kestiona ninia rikeza ne’e hetan liuhosi meiu saida, liuhosi meiu legál ka liuhosi meiu korrupsaun.

Objetivu terseiru, maka, ho deklarasaun ne’e, bele hetan konfiansa sidadaun nian ba estadu, ba ema ne’ebé mak kaer asuntu estadu, hahú kedan ho kargu polítiku to’o kargu diretór sira.

“Ita halo ida ne’e atu bele hetan aumentu konfiansa hosi públiku, tanba fiar katak, sira ema moos, transparente, sira la’ós uza kargu boot sira atu hariku sira nia aan,” Asesór Anildo esplika.

Asesór ne’e fó ezemplu, ministru ida mai ho telemóvel ho modelu ida-ne’e no nia mandatu durante tinan lima no sei sai hosi kargu ida-ne’e, nafatin ho telemóvel ida-ne’e.

Tanba ne’e, Asesór ne’e konsidera katak ho artigu sira iha prevensaun nian sei halo sidadaun sira fiar liután estadu tanba fó kritériu ida todan ba ema ne’ebé asume kargu públiku ho responsabilidade no la hanoin atu halo korrupsaun.

Entretantu, Komisáriu CAC, Sérgio Hornai, mós konsidera artigu ida-ne’e di’ak tanba fó duni kompeténsia ba instituisaun relevante atu bele halo ninia servisu monitorizasaun susesivamente (berkelanjutan) ba ema ne’ebé assume kargu públiku ninia rikusoin sira to’o ema-ne’e nia mandatu ramata.

“Artigu ida-ne’e ninia finalidade atu eleva ema ne’e ninia integridade. Katak, halo prestasaun ida di’ak, aumenta transparánsia, atu nune’e sidadaun hotu bele iha konfiansa ba iha instituisaun ne’ebé nia haknaar aan ba. Sidadaun ne’e bele estranjeiru, bele nasionál, hodi bele aumenta tan seguransa no garantia ida katak instituisaun estadu ida-ne’e iha ninia integridade, ema konfortável liu atu bele halo servisu. Liu tan ida ne’e, atu bele dada ema mai halo investimentu.” Sérgio hateten.

Aleinde ne’e, Deputada Carmelita Caetano Moniz konkorda ho artigu ‘Declaração Bens  no Interesses’ tanba engloba buat hotu, ligadu ho bens ne’ebé ema ne’e iha, rikeza ne’ebé iha, patrimonial no naun patrimoniál, rendimentu ne’ebé iha mai hosi ne’ebé, nia hetan oinsá ho nia saláriu hotu ema ne’e tenke deklara.

Entretantu, artigu ne’e hakerek orijinál ho lian Portugés  ne’ebé seidauk iha tradusaun ba lian Tetum ofisiál hanesan tuir mai ne’e; Capítulo II, Do Regime de Declaração de Bens e Interesses, Secção I, Finalidade, Artigo 260.

Iha Secção I, Finalidade, haktuir ho lian Portugés  ne’ebé haktuir; Por este regime são estabelecidas as regras do sitema de declaração de interesses e bens, doravante designada simplesmente por  “declaração”, de pessoas que exercem funções públicas, o qual tem a seguinte finalidade:

  1. Detetar e prevenir conflitos de interesses;
  2. Monitorar a variação de riqueza para detetar aumentos significativos e injustificados no património das pessoas sujeitas à declaração;
  3. Aumentar a transparência e a confiança do cidadão na administração Pública, pela publicação de informação sobre o património de titulares de cargos politicos e outros cargos importantes.

Kona-ba kategoria kargu públiku ne’ebé LAC uza hodi kontrola ho artigu 26, sei haktuir iha seksaun II deklarasaun Bens no Interese artigu 28 kona-ba ‘Pessoas obrigadas a declarar’.

Deputadu sira hosi Komisaun A Parlamentu Nasionál Asuntu Konstitusionais no Justisa ne’ebé partisipa iha dikusaun ne’e mak hanesan Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes, Carmelita Moníz, Óscar de Araújo, António Nobre Amaral Tilman, no  Francisco David Xavier Carlos, eseptu Adriano do Nascimento la marka prezensa tanba kaondisaun saúde.

Entidade relevante sira ne’ebé partisipa mós iha diskusaun ne’e mak hanesan diretór Nasionál Assessoria Jurídika no Lejislasaun (DNAJL sigla Portugés) Ministériu Justisa, Adjuntu Prokuradór Jerál Repúblika Alfonso Lopez,  Estrutura KAK kompostu husi komisáriu Sérgio Hornai, Komisáriu Adjuntu Augusto Castro, ho Luis Sampaio, Diretór Jerál Prevensaun no Sensibilizasaun Rosário de Araújo, akompaña husi Asesora Jurídika Mariman Oliveira, Diretór Polisia Sientifika Investigasaun Kriminál (PSIK), Vicente F.Brito, provedora Provedoria Direitus Umanus no Justisa Jesuinha Gomes, Asessór Jurídiku Komissaun A Parlamentu Nasionál, Anildo da Cruz ho Pedro Andrade, Diretora Ezekutiva Organizasaun Naun Governamentál Programa Monitarizasaun ba Sistema judisiária (JSMP), Ana Paula Marçal, Reprezentante Grupu Feto Parlamentár Timor-Leste (GMPTL sigla Portugés).

Jornalista : Cipriano Colo

Editór        :  Cancio Ximenes

HAKEREK NO HATÁN

Please enter your comment!
Please enter your name here