Jerente Programa Voluntária ONG KOICA-KIDC, Choi Eun Young, entrega apoiu ekipamentu COVID-19 ba Diretór Eskola 10 de Dezmebru Calistro Guterres, foinlalais ne'e. Imajen/KOICA

DILI, 24 juñu 2020 (TATOLI)-Ajénsia Kooperasaun Internasionál Korea (KOICA), kuarta ne’e oferese ona fasilidade prevensaun COVID-19 ba estudante Ensinu Báziku Sentrál 10 de Dezembru Comoro Dili.

Ekipamentu ne’ebé oferese ona husi KOICA maka hanesan máskara rihun 3, sabaun fase liman 100, termometru eletróniku rua, no mós manual prevensaun coronavirus ba estudante no profesór sira.

Diretór Eskola, Calistro Guterres, hateten ho tulun husi KOICA-KIDC sei fasilita estudante no profesór sira atu halo prevensaun ba moras COVID-19 bainhira re-ativa prosesu aprendizajen.

“Ha’u lori estudante hotu husi eskola 10 de Dezembru nia naran hato’o obrigadu barak laiha buat ida ami fó fali ba ita bo’ot sira, maibé ami husu ita hametin nafatin kooperasuan ba oin metin liután,” dehan nia  iha EBS 10 de Dezembro, kuarta ohin.

Iha fatin hanesan Jerente Programa Voluntária ONG KOICA-KIDC, Choi Eun Young,hateten ho apoiu ne’e sei tulun eskola refere atu moris iha ambiente ida moos no seguru hodi kontribui ba proagasaun COVID-19.

“Ami haksolok tebes hodi lidera eventu iha ohin loron ne’e, hodi halo doasaun materiál prevensaun COVID-19 nian, ami mós kontente tanba ita bo’ot sira bele atende ami ho di’ak maski ita bo’ot sira iha orariu ne’ebé okupadu tebes,” dehan jerente KOICA ne’e.

KOICA-KIDC fiar katak ho distribuisaun ekipamentu ne’e  bele hametin liután koopersaun di’ak entre parte rua iha futuru.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here