Diretór Ezekutivu CEPAD, João Boavida. Imajen Tatoli/Egas Cristóvão

DILI, 02 jullu 2020 (TATOLI)—Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, espera implementasaun Lei Antí Corrupção (LAC) iha futuru labele hasoru intervensaun polítika hosi polítiku sira.

Diretór CEPAD konidera LAC la’ós importante ba Comissão Antí Corrupção (CAC) de’it maibé importantísimu ba sosiedade sivíl, mídia, instituisaun antí korrupsaun estadu nian hanesan PDHJ, PSIK no PJR ne’ebé iha unidade ida atu kombate korrupsaun iha Timor-Leste.

Notísia Relevante: Komisaun A Konsege Diskute Artigu Hamutuk 15 hosi Rejime Deklarasaun Bens no Interese

João Boavida hateten, esbosu-Lei Antí Corrupção (LAC) importante hodi kriminaliza ema riku matak, kriminaliza konstrusaun sira-ne’ebé la finaliza ka paradu, kriminaliza krime  fase osan no tráfiku droga.

“Buat sira ne’e halo-parte iha krime korrupsaun, ne’ebé buat sira  ne’e akontese iha nível leten aas ba. Iha implementasaun LAC ne’e aplika duni ba leten aas ba ka lae, tanba se lae ita bele iha Lei Antí Corrupção ida di’ak maibé kuandu to’o iha nia implementasaun la’o la loos, sentidu hosi lei ne’e mós lakon. Comissão Antí Corrupção bele implementa lei maibé la’ós CAC mesak mak sei responsabiliza se defaktu iha nia implementasaun la’o loos ka la loos tanba kestaun intervensaun polítika,” dehan João Boavida ba Agência TATOLI iha nia rezidensia, Bidau, Dili, kinta ne’e.

Diretór CEPAD ne’e argumenta, bainhira CAC deteta irregularidade no má-administrasaun iha administrasaun públika maibé dererepente telefone tama dehan labele book krime korrupsaun ne’e, entaun CAC sei hasoru dezafiu maske iha ona LAC.

“Ne’e mós sai dezafiu boot ba CAC tanba influénsia hosi polítiku sira tanba ohin loron situasaun ne’e akontese. Solusaun hodi impede situasaun ne’e labele akontese mak CAC tenke independente no profisionál. Maibé CAC atu sai independente no profisionál susar uitoan tanba CAC Governu nia órgaun ida, ne’ebé simu osan no simu orden hosi Governu,” Diretór Ezekutivu CEPAD ne’e hateten.

Solusaun seluk, nia dehan, mak mídia tenke forte hodi ajuda CAC hodi deskobre kualkér aktus krime korrupsaun sira, nune’e mídia halo rerpotajen investigativu.

Tuir nia observasaun, durante ne’e lei barak ne’ebé prodús hosi Parlamentu Nasionál no Governu rasik maibé iha nia implementasaun ne’e la’o mak la la’o ba oin.

“Realidade lei ne’e aplika grupu ida de’it, ba grupu seluk la aplika. Ko’alia loloos katak aplika de’it ba povu kiik sira maibé boot sira la aplika tanba lei ne’e barak. Kestaun mak iha nia implementasaun sei la’o duni ka lae. Ita iha lei kapaas no furak maibé ita tenke akompaña iha ninia implemenetasaun tanba sei aplika de’it ba funsionáriu kiik sira. Maibé, tenke aplika mós ba ministru sira, ba Primeiru-Ministru sira. Ha’u hanoin ida-ne’e mídia tenke la’o tuir nafatin para asegura bainhira iha lei ne’e ona,” nia esplika. 

Notísia Relevante: Lei Kriminaliza Difamasaun Sei “Blokeia” Implementasaun LAC

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here